Godhong Kumis Kucing Dalah Mupangate
Diposting oleh : Administrator
Kategori: Kasarasan - Dibaca: 137 kali

Tanduran kumis kucing (kk) utawa brengos kucing (orthosiphon stamina benth) ing karang padesan Jawa Tengah kerep disebut remujung. Tanduran iki pranyata nduweni kembang kang aneh. Benang sari (bibit lanang) lan putike (pentil) njlanthir metu lan dawa memper brengose kucing. Mulane katelan kanthi sebutan kumis kucing.

Kumis kucing sing asale saka laladan Afrika tropis iki nyebar mengetan tekan tlatah India, Madagaskar, Indo China, Thailand, Malaysia, Indonesia nganti Australia. Tanduran kumis kucing (remujung) bisa thukul ing ngendi-endi panggonan. Ing kalen, tegalan, lemah rada umes (lembab) lan gembur.

Ing kapustakaan disebutake menawa tanduran kumis kucing nduweni kembang warna rong jinis. Ana sing putih memplak lan ana sing rada wungu. Masyarakan padesan wis padha nyumurupi yen tanduran iki nduweni khasiyat kanggo tetamba lelara utamane sing magepokan karo saluran pipis kang ora lancar, klebu anyang-anyangen.

Sejatine isih akeh maneh mupangate godhong kk iki mungguhing kasarasan. Apamaneh yen ditambah herbal liyane kang tundhone bisa dadi racikan kang ampuh. Kayadene bisa ngusadani lelara anti radhang, anti bakteri, nglancarake uyuh (diuretik), ngejur watu saluran pipis lan uga bisa nglancarake fungsi kerjane ginjel.

Malah ana kang nyebutake, godhong kk kang dicampur karo pace (mengkudu) kang wis mateng bisa dadi obat alternatif tumrap lelara hipertensi (tekanan darah tinggi).

Ana ing pengobatan tradhisional, godhong kk kang wis digaringake umume digunakake kanggo babagan nglancarake pipis, uga lelara watuk kang ngikil, encok, lan masuk angin.

Carane, mundhut udakara 4-5 gram godhong kk garing, nuli digodhog nganggo banyu rong gelas nganti umob. Banjur disaring lan bisa diunjuk esuk lan sore ½ gelas sawise dhahar. Bisa diambali 3-4 dina.

Kagem kang kena batu ginjal bisa kanthi nggodhog godhong kk 30 lembar dicampur banyu rong gelas. Diumobake nganti kari ½ gelas. Yen wis adhem disaring bisa diunjuk pendhak esuk. Bisa diambali nganti 5-6 dina.

Panjenengan uga bisa ngagem ra­-cikan godhong kk garing 30 gram, te-mulawak dirajang tipis-tipis 25 gram, godhong kejibeling garing 30 gram, rambut jagung 30 gram lan banyu 800 mililiter. Racikan kasebut digodhog bareng nganti umob lan banyune kari separo (400 ml). Yen wis adhem diunjuk esuk lan sore @ 200 ml.

Kagem kang nandhang radhang ginjel (nefritis), lelara iki sumbere anane infeksi bakteri streptoccocus sing nyerang ginjel, kang nyebabake anane gangguwan lan peradhangan ing ginjel.

Mundhut godhong kk garing 30 gram, temulawak 20 gram (dirajang tipis), sambiloto 20 gram, meniran 30 gram lan banyu 1.000 mililiter. Racikan kasebut digodhog nganti umob nganti kari separone (500 ml). Disaring lan bisa diunjuk esuk lan sore, saben saunjukan 250 ml. Bisa diambali nganti limang ndina.

Dene sing gerah kencing nanah (gonorhoe) bisa diusadani kanthi racikan godhong kk 20 lembag (teles), woh kemukus 20 iji, bubuk kayu cendana sasendhok lan banyu sagelas (250 ml).

Racikan iki nuli digodhog nganti umob. Yen wis adhem disaring lan dicampur gula batu utawa madu yen arep diunjuk. Sorene gawe racikan maneh kanthi ukuran sing padha.

Godhong kk pranyata nduweni kandhutan kang pepak, yaiku sinensitin, zat samak, lenga atsiri, lemak, saponin, glikosida orthosiphonin, garam kalium, tanin, kerotinoid lan akeh maneh liyane.

Kandhutan orthosiphonin lan garam kalium mujudake perangan pokok kang aweh pambiyantu ngejur asam urat, fosfat lan oksalat ing njero badan. Mligine ing kandhung kemih, empedu utawa ginjel, saengga bisa nyegah anane nep-nepan batu ginjel. Dene sinensitin duwe khasiyat anti bakteri.

n (FX. Suyatno)

 

Berita Terkait

Samak Minggu Ini

img

img

Sumber Semangat

Urip ing donya iki gawe kesel, merga akeh wong kang pengin mamerake bab-bab kang satemene dheweke ora nduweni.

Klik

BUKA PALING DAWA

Rekor buka pasa paling dawa ing donya, ana ing Hanover, Jerman mentas iki. Dawane nggayuh 10.2 km. Gunggung mejane 10.200 meja, lan sing melu buka ana wong 42.100. Acara iki wis kaca-thet ing Guiness Book Record. Iki nuduhake yen wong kang nggilut agama Islam ing Jerman saya akeh wae. (d/ist)

Pethilan

Janji-janji reformasi diajab enggal dicepetake

Janji kang dilalekake

Jamane reformasi wis 20 taun

KKN durung ilang uga

Bulog mesthekake stok beras aman nganti riyaya

Bab mundhak orane rega aja takon lo ya