Perang Paripurna Mbrastha Narkoba
Diposting oleh : Administrator
Kategori: Pangudarasa - Dibaca: 15 kali

Ora bisa disélaki yèn Indonesia ana ing darurat, malah super darurat narkoba. Anané narkoba marang bangsa kita wis nguwatiraké banget. Mula wis wayahé negara kita mbrastha kanthi cara sing luwih luwar biyasa manèh. Fakta nuduhaké yèn pemakai narkoba saya mundhak. Taun 2016 waé, luwih saka 6 yuta rakyat kita kejiret narkoba. Malah pengguna sing nemahi tiwas nggayuh ± wong 50 / dina. Wulan kepungkur, penyelundhupan narkoba 2,6 ton kasil ketangkep.

Narkoba iku regané larang banget. Lha yèn semono akèhé iku, pira pengajiné ? Iku sing kasil kecekel. Mangka normalé kaya fenomena gunung es. Manut tilas Kepala BNN, Komjen Budi Waseso, atusan ton narkoba liyané ucul saka pengawasan lan ngracuni yutan warga negara. Yèn bandar narkoba saya nékad nyerang Indonesia, wis samesthiné yèn kita uga saya sengkud gumregut anggoné mbrastha. Yèn para mafia tansah nemokaké cara anyar kanggo nylundhupaké narkoba, wis wayahé negara awèh kewenangan luwih gedhé lan ampuh marang penegak hukum, wujud sarana lan prasarana sing bisa ngatasi lan mrantasi gawé.

Ing paprangan, sengara cukup kita ngadhepi mungsuh mung nganggo bedhil yèn mungsuh kita nggunakaké rudal lan sabangsané. Mesthi kita bakal kalah lan ajur mumur. Semono uga sangsiné, wis wektuné negara ngetrapaké sangsi sing setimbang lan ngapokaké. Presiden Jokowi péngin, kepala BNN sing anyar, Irjen Heru Winarko ngetrapaké budaya kerja KPK ing BNN. Iku becik banget. Nanging budaya thok ora cukup yèn keistiméwaan KPK ora diadhopsi, salah sijiné yaiku awèh kewenangan penyadhapan.

Bener, yèn BNN wis diwenangaké nyadhap, nanging kanthi syarat, kudu ana izin tertulis saka ketua pengadilan. Uga bener yèn UU Narkoba wis awèh kewenangan marang penyidik BNN, ngayahi penyadhapan tanpa izin tertulis saka ketua pengadilan yèn ing kahanan mendhesak. Nanging kewenangan mau mung berlaku 1x 24 jam lan ora dijlèntrèhaké kahanan mendhesak sing kepriyé. Kamangka, penyelundhupan lan perdagangan narkoba akèhé diayahi kanthi telepon. Para narapidana ngendhalèni bisnis narkoba saka njero pakunjaran, mesthi nggunakaké telepon. Mula, wajar lan relevan banget yèn BNN diwènèhi kebébasan nyadhap.

Sangsi marang bandar narkoba, wujud pakunjaran, sangsi sosial, dimlarataké lsp, lan sing paling abot pidana pati. Indonesia isih ngidinaké ukuman mati. Pemerintah Jokowi-JK wis ambal kaping telu ngleksanakaké eksekusi mati. Jaksa Agung M. Prasetyo wis nyebut yèn bakal ngleksanakaké  eksekusi jilid IV. Apamanèh perédharan narkoba ana gandhèng cènèngé karo jaringan sing saiki “ndhekem” ing LP (pakunjaran).

Bab eksekusi mati iki isih ana pro lan kontra. Sing kontra nyebut yèn isih tansah kedadéyané   penyelundhupan narkoba nuduhaké yèn ora ana korelasi positip antarané eksekusi mati lan efek jera para bandar narkoba. Tur manèh pidana pati lelawanan karo HAM, lan saya akèh negara sing wis nglarang ukuman mati. Sing pro nyebut yèn ora ana bandar sing ora wedi mati. Anané penyelundhupan isih kedadéyan, awit eksekusi mati isih tansah ditungka, ora ndang-ndang dileksanakaké. Kamangka kesané para bandar, hukum ing Indonesia “bisa dituku”. Yèn eksekusi mati dianggep nglanggar HAM, akibat ulahé bandar narkoba iku apa ora kliwat-liwat anggoné nglanggar HAM, nganti ana wong 50 nemahi tiwas saben dinané ?

Kita ngurmati panemuné sing kontra ukuman mati. Nanging kita rasa, eksekusi  ukum pati wis dileksanakaké kaping telu waé penyelundhupan narkoba isih saya nderbala. Banjur kaya ngapa polahé para bandar narkoba yèn eksekusi mati iku disuwak ? Mesthi para bandar narkoba saya wuwuh nékadé. Jer sakèhing sangsi hukum ing negara kita “bisa dituku” ?

Mula kita tetep sarujuk ukuman mati dileksanakaké, sinambi ukuman liyané kaya sangsi sosial, mlarataké, ngukum ing LP pulo kepencil lsp dicoba. Sing cetha, perang mungsuh narkoba wis dadi perang gedhé sing mbutuhaké penanganan paripurna, ora mung setengah-setengah. (MW).

Berita Terkait

Samak Minggu Ini

img

img

Sumber Semangat

Aja nganggep awakmu tansah salah, uga aja nganggep awakmu tansah bener.

Klik

KAYA JELI

Iki dudu plastik utawa ager-ager jeli, nanging iki bangsane iwak. Jelase iki Plankton kang wujude bening. Jeneng latine yakuwi Salp (Salpingo-oophorectomy) mujudake kewan kang nduweni kaunikan kanthi kulit transparan. Saking transparane, akeh wong ngira yen plankton iki plastik bening kang ngambang ing laut. (d/ist)***

Pethilan

Saperangan gedhe kabutuhan bawang putih diimpor

Petani wis biasa nangis bawang Bombay kok!

Sertifikasi tanah kuwi program nyata, dhawuhe Presiden

Dadi sing apus-apus sapa iki?

Wakil rakyat saya adoh saka rakyat

Saya adoh, menyang segara wae!