Nginum kopi, Mbiyantu Wong Lara Diabetes Luwih Dawa Umure
Diposting oleh : Administrator
Kategori: Kasarasan - Dibaca: 56 kali

Kopi mujudake salah siji jinis inuman paling kesohor ing donya. Kopi uga dadi inuman kla­wan sakehing manfaat kanggone kasa­rasan. Ya, sanajan kadhang-kadhang ka­kehan nginum kopi kang ngandhut kafein iku ana resiko alane mungguhing kasa­rasan.

Ambune kopi kang sedhep, rasane kang mantep nalika dicampur karo gula sethithik, madu utawa susu, ndadekake sapa wae sajak ora bisa nulak anggone nikmati sedhuhan kopi.

Dicuplik saka laman boldsky.com, pa­naliten anyar kang ditindakake ilmuwan lan diumumake ing Annals of Internal Journal nyebutake yen kopi ora mung enak, nanging uga bisa gawe dawa umur. Nginum kopi digayutake karo per­tahanane badan marang sakehing risiko penyakit kang bisa mateni, salah sijine diabetes.

Panaliten kang ditindakake marang saora-orane wong 520.000 ing Eropa di­te­mokake yen kopi rapet sesambungane karo umur. Panaliten iki nemokake yen responden (wong sing ngisi angket) kang nginum kopi luwih akeh kanthi cara kang trep nduweni umur luwih dawa. Sawata­ra iku, panaliten kang ditindakake ma­rang sethithike wong 185.000 ing nega­ra-negara ing Afrika-Amerika, ditemok­ake yen wong-wong sing nginum kopi sedina 4 cangkir nduweni resiko mati 18 persen luwih endhek dibandhingake karo wong-wong sing ora kulina nginum kopi.

Responden kang ditemtokake jinis larane (didiagnosa) diabetes sadurunge malah ditemokake bisa urip luwih ten­trem ati lan pikirane, kuwat tahan urip lan dawa umure. Wong sing nandhang diabetes kang ajeg nginum kopi ing saben dinane dikandhakake 51 persen luwih endhek duwe resiko mati yen diban­dhing­ake karo sing lara diabetes kang ngemohi nginum kopi.

Sanajan kopi bisa ndawakake umur, kopi kudu dikonsumsi kanthi trep dening wong kang nandhang diabetes utawa sok­sapoa wae. Kopi tumrap sing lara di­abetes becike dicom murni tanpa di­campur gula, susu, panganan olahan, alkohol lan panganan kang digoreng.

Wigati uga yen kareman nginum kopi dibarengi klawan ngecakake lageyaning urip sehat, ajeg olahraga, ngaso sing cu­kup lan nginum banyu putih sing akeh. Pikiran ora oleh stres apamaneh de­presi. Adate, yen kita klebu pawongan kang karem nginum kopi ing saben dina­ne, me­nawa wae kita duwe kareman nge­mil sing legi-legi. Jalaran pranyata, rong bab iki sesambungane rapet.

Panaliti panganan, Robin Dando, ngan­­dhakake ing MyBody+Soul yen kopi bisa ngowahi cara kita ngrasakake pa­nganan lan ndadekake kita condhong mi­lih panganan kang ora sehat. Umume, nalika kita nginum kopi, salah siji panga­nan kang dadi gandhengane kopi mesthi sing legi-legi.

Tanpa disadhari yen bab iku wis ngundhakake kadar gula darah ing wa­yah esuk. Bab iki pranyata bisa menga­ruhi pilihan panganan kita sadawaning dina. Tanpa kita sadhari, nginum kopi le­gi wayah esuk bakal mbiyantu luwih ke­rep ngemil legi-legi utawa mesisan pa­it, kadar gula darah ora bakal nyeng­krek kaluwih-luwih. Utawa nggabungake panganan gandhengane kopi nganggo panganan sing gurih kayadene ngimil ka­cang, utawa mesisan sarapan sehat.

Sanajan mangkono, akeh panaliten kang aweh eguh pratikel kanggo ngura­ngi konsumsi kopi, ana uga kang aweh eguh pratikel sedina nginum kopi cukup telung cangkir wae. Kabeh iki gumantung kahanane badan kita. Yen pancen nginum kopi ndadekake badan kita krasa luwih ke­penak, ya ora masalah, sauger ora ngganggu marang kasarasane badan kita. (Ist)

 

Berita Terkait

Samak Minggu Ini

img

img

Sumber Semangat

Aja nganggep awakmu tansah salah, uga aja nganggep awakmu tansah bener.

Klik

KAYA JELI

Iki dudu plastik utawa ager-ager jeli, nanging iki bangsane iwak. Jelase iki Plankton kang wujude bening. Jeneng latine yakuwi Salp (Salpingo-oophorectomy) mujudake kewan kang nduweni kaunikan kanthi kulit transparan. Saking transparane, akeh wong ngira yen plankton iki plastik bening kang ngambang ing laut. (d/ist)***

Pethilan

Saperangan gedhe kabutuhan bawang putih diimpor

Petani wis biasa nangis bawang Bombay kok!

Sertifikasi tanah kuwi program nyata, dhawuhe Presiden

Dadi sing apus-apus sapa iki?

Wakil rakyat saya adoh saka rakyat

Saya adoh, menyang segara wae!