Mei, Lelang Proyek Trem Diwiwiti
Diposting oleh : Administrator
Kategori: Yak Opo Kabare - Dibaca: 80 kali

Wiwit digagas taun 2013, proyek wujud trem Surabaya akhire enggal maujud. Kementerian Perhubungan arep mbukak lelang proyek pengaji Rp 4,5 triliyun iki suk Mei 2018 lan ditargetake wiwit dibangun pungkasan taun iki, lan bisa dikerjakake suwene rong taun.

Menteri Perhubungan Budi Karya Sumadi bubar Dialog Nasional Sukses Indonesiaku, Selasa mentas iki ing Airlangga Convention Center Universitas Airlangga, Surabaya, mratelakake, Kementerian Perhubungan wis ngrampungake proyek perencanaan fisik (detail engineering desain) trem Surabaya. Saiki mlebu tataran sosialisasi kanggo ngabarake anane proyek marang masyarakat.

Proyek trem Surabaya iki mlebu proyek strategis nasional. Ragad Rp 4,5 triliyun kasebut, manut Budi ditindakake dening pamarentah karo nggandheng pihak swasta liwat skema kerja sama pamarentah karo badan usaha (KPBU).

Dene pehak sing bakal melu ngragadi proyek kasebut yaiku pamarentah pusat, Pemerintah Kota Surabaya, PT Kereta Api Indonesia (Persero) kang tinanggenah minangka pehak sing duwe dalan trem 70 persen, lan swasta. Dene pamarentah pusat direncanakake melu cucul pawitan Rp 1 Triliyun- Rp 1,5 triliyun.

“Lelange proyek iki bakal dileksanakake sasi Mei 2018 lan dibangun wiwit pungkasan taun iki. Ditargetake trem Surabaya bisa operasi pungkasan taun 2020 jalaran panggarape mbutuhake wektu 24 sasi,” ujare Budi.

Trem Surabaya gumelar dawane 17 kilometer saka Jayoboyo engga Jalan Rajawali. Dalan sing kudu diliwati kasebut bakal ngliwati tengah kutha Surabaya lan ngliwati saperangan “ikon”, kayadene Jalan Tunjungan lan laladan Jembatan Merah.

Trem Surabaya minang-ka salah siji trasnportasi massal kang saben jam saguh nampung penumpang  kehe wong 4.500. Ndheg-ndhegan ing sadawane dalan sing diliwati cacahe ana 29 klawan wektu tunggu saben kreta udakara nem menit. Dene wektu kang dilakoni saka Joyoboyo engga Jalan Rajawali udakara 17 menit. “Taripe bakal ditemtokake sawise dianakake survei, nanging dipesthekake bakal ana subsidi saka pamarentah pusat lan Pemkot Surabaya supaya ragade murah saengga gawe wong ketarik migunakake angkutan umum dibandhing kendharane dhewe (pribadi),” jlentrehe Budi.

Manut Kepala Dinas Perhubungan (Dishub) Surabaya Irvan Wahyu Drajat, Pemkot Surabaya nyepakake srana panyengkuyung trem, ing antarane pembangunan gedhong parkir ing Terminal Joyoboyo lan Jalan Urip Sumoharjo. Kejaba iku, ana bis kanggo momot penumpang saka Terminal Purabaya nuju Terminal Jayoboyo kehe 10. Bab iki kanggo ngulinakake masyarakat supaya ora migunakake kendharaan pribadi nalika liwat ing tengah kutha.

“Pemkot Surabaya uga bakal mbangun kreteg kang nyambung Stasiun Wonokromo karo Terminal Jayoboyo kanggo nggampangake penumpang sepur sing arep pindhah ganti numpak trem,” ujare Irvan. (Bsh)

Berita Terkait

Samak Minggu Ini

img

img

Sumber Semangat

Urip ing donya iki gawe kesel, merga akeh wong kang pengin mamerake bab-bab kang satemene dheweke ora nduweni.

Klik

BUKA PALING DAWA

Rekor buka pasa paling dawa ing donya, ana ing Hanover, Jerman mentas iki. Dawane nggayuh 10.2 km. Gunggung mejane 10.200 meja, lan sing melu buka ana wong 42.100. Acara iki wis kaca-thet ing Guiness Book Record. Iki nuduhake yen wong kang nggilut agama Islam ing Jerman saya akeh wae. (d/ist)

Pethilan

Janji-janji reformasi diajab enggal dicepetake

Janji kang dilalekake

Jamane reformasi wis 20 taun

KKN durung ilang uga

Bulog mesthekake stok beras aman nganti riyaya

Bab mundhak orane rega aja takon lo ya