Jula-Juli
Diposting oleh : Administrator
Kategori: Rena-rena - Dibaca: 44 kali


JENDRAL Budi Gunawan sing nate dadi tersangka KPK, bali dionyol-onyolake PDIP supaya dadi Cawa­prese Jokowi jroning Pilpres 2019. * Sa­jake Megawati terus ngulir budi, priye carane balas budi marang pejabat sing nate dadi ajudan pribadine.

***

SENAJAN didheseg mundur 54 Guru Besar Perguruan Tinggi, Ketua MK Arief Hidayat sing wis ping pindho disendhu Dewan Etik, tetep suthik mundur. * Tiwas para Guru Besar marah besar, merga iki dudu kasus besel, di­anggep dudu masalah besar.

***

JRONING sidhang Tipikor bali M. Nazarudin bukak kartu, duwe bukti yen Fahri Hamzah melu korupsi lan bisa dadi tersangka KPK. * Layak marang KPK banget nggone gething. Yen ana buk­tine sakcething, Fahri Hamzah ing rutan KPK mung kari njengking.

*** 

LIWAT UU MD3 sing nembe disahake, liwat pasal 122 DPR bakal nuntut utawa ngukumake pa-ra pengritik sing ngesorake anggota DPR. * Nek ngono DPR kuwi malah dadi (D)ewan (P)engancam (R)akyat, sena­jan akeh sing keblinger tetep rumangsa bener.

***

RIKALA Presiden Jokowi pidhato ing kampus UI Depok, Ketua BEM-UI Zaadit Taqwa ngetokake kartu kuning, nyuwun presiden nggatek­ake Asmat (Papua). * Durung studi ban­ding wis ngetokake kartu kuning, temah­an omongane kaya bocah ndleming.

***

KPU wis netepake, Pemilu-Pilpres 2019 mbesuk bakal dieloni 14 parpol, sing 10 mujudake partai lawas dene sing 4 partai anyar. * Parpol nganti kaya grontol, kabeh ngaku paling jempol, dhuwit Caleg diodhol-odhol, sing kalah dodolan tempe mondhol.

***

NOMER parpol-e uga wis diundhi. Partai Demokrat entuk No. 14, dene No. 9 sing diimpi-impi ma­lah kecekel Partai Perindo. * Seneng no­mer sanga, sajake Demokrat pengin ga­gah prakosa kaya singa, senajan tanpa sungu, mungsuhe bakal singunen.

***

NGADHEPI Pilkada Serentak Juni 2018, wis ana bupati petahana 4 cacahe kena OTT KPK, merga golek setoran biaya kampanye. * Bupati padha kepati-pati luru upeti, betheke pe­ngin mbaudendha hanyakrawati.  Weka­sane keselak mati sadurunge mukti!

***

AMRIH Baznas saya kuwat, Mentri Agama Lukman Hakim darbe usul, PNS dipotong blanjane 2,5 % kanggo mbayar zakat. * Apa blanjane PNS kabeh wis nyukupi sarat nisab? Yen pemerintah terus nesebi dhuwite rakyat, nasibe PNS tambah seneb.

***

MENTRI Keuangan Sri Mulyani nembe iki entuk pengaji-aji, minangka mentri sing paling becik sadonya (Best Minister in the World Award). * Sri Mulyani pancen mulya ati­ne, nadyan wis dadi milyuner ing AS, tri­ma mulih kanggo mulyakake bangsa.

***

NANGING Fadli Zon Wakil Ketua DPR malah menjeb, kok bisa-bisane entuk pengaji-aji, wong target ekonomine Sri Mulyani padha mleset. * Fadli mono pancen tukang si­nis, rumangsa paling wasis, karo peme­rintah mung lamis, omongane ngecuwis.

***

BOLA-BALI diwertakake pengacarane, yen Habib Rijiek sedhela maneh bakal bali saka Arab. Na­nging jebul tetep ora ana nyatane. * Je­nenge wae advokat, omongane empuk kaya alpukat, gorohe ora mekakat, su­prandene wong padha hormat lan ta’at.

***

RIKALA Ketum PKB Muhaimin Iskandar ngemping didadekake Cawaprese, Presiden Jokowi nanggapi usulan mau mung pratela: ba­gus! * Luwih bagus, Cawapres Jokowi kudu ilmu agamane putus, ora kakehan wuwus sing nggedebus, tur sugih fulus.

***

MANUT Gubernur Anies Baswedan, Jakarta salah konsep ngurus banjir. Banyu udan kudune mlebu lemah, dudu diilekake liwat kali menyang segara. * Nek ngono lagu Bengawan Solo perlu dikoreksi, dudu “akhirnya ke laut”, ning “akhirnya ke tanah….”.

(GTS)

Berita Terkait

Samak Minggu Ini

img

img

Sumber Semangat

Akeh wong kang nindakake bab kang padha ing nalikane kowe ora. Kuwi ora ateges kowe salah.

Klik

GROJOGAN PEDHUT-

Yen grojogan umume sing mili yakuwi banyu, nanging grojogan ing Islandia iki sing mili pedhut. Pedhut ksb mbentuk pola kaya banyu kang nggrojog saka gunung menyang segara. Pranyata uga ana suwarane banyu gembrojog ing segara mau, saengga kaya banyu kang nggrojok temenan ing laut. (d/ist)***

Pethilan

Nangkis hoaks, publik perlu ndhi-sikake rasionalitas

Benci nganti tekan unyeng-unyeng kuwi mutawatiri

DPR ora kesusu ngrembug RUU HP

Ora kaya RUU MD3 ya?

Partai Demokrat njaluk syarat kanggo nyengkuyung Jokowi

Ora ana mangan awan gratis pancen…