Apa Nasibe Persija Bakal kaya Persib lan Arema?
Diposting oleh : Administrator
Kategori: Olahraga - Dibaca: 72 kali

Ora bisa diselaki yen Persija Jakarta tampil fantastis ing kajuwaran Piala Presiden 2018 mentas iki. Kepriye ora, runner up Liga 1 mangsa kepungkur, Bali United, diajar telung gul tanpa bales ing pertandhingan puncak kang digelar ing Stadion Utama Gelora Bung Karno, Sena­yan, Jakarta, Sabtu kepungkur (17/2).

Meh saisine stadion kang dikebaki su­porter Persija keli jroning euforia sawise sem­pritan dawa diunekake wasit. Ana sing jingkrak-jingkrak girang. Ana uga sing na­ngis trenyuh. Malah, saperangan penonton nekat ngangsek mlebu lapangan mung sa­perlu pengin selfie utawa ngrangkul pemain idolane.

Sesawangan kaya ngene iki uga lumrah ana ing Serie A Liga Italia. Biasane, suporter padha mudhun menyang lapangan saram­punge nindakake dhuel kandhang pungkasan musim, me­sisan ngrayakake klub kesayangane kang wis jelas dadi juara.

Persija semono uga kasil ngilangake rasa kangen juara kang pungkasan dhewe dipethik yakuwi nalika Liga Indonesia 2001. Ora luput Wakil Gubernur DKI Jakarta Sandiaga Uno uga nulis ucapan selamat kanthi nggawa embel-embel pasa gelar suwene 17 taun. “Sawise 17 taun pasa juara, mau bengi Tim Macan Kema­yoran bali jaya lan menangake Piala Presiden” tulise Sandi ing akun Twitter pribadine.

Nanging apa bener Persija bakal tetep jaya sawise menangake Piala Presiden? Mengko gek nasibe kaya Persib Bandung lan Arema?

Persib Bandung lan Arema FC tampil mlempem nganti saiki sawise padha dadi juara Piala Presiden. Apa Macan Kemayoran nasibe bakal padha karo Maung Bandung lan Singo Edan?

Nalika tanggal 18 Oktober 2015, Persib Bandung nga­lah­ake Sriwijaya FC kanthi skor 2-0 jroning laga final Piala Presiden kang digelar ing Stadion Utama Gelora Bung Karno (SUGBK). Gelar mau saya nguwatake Maung Bandung minangka klub paling apik ing Tanah air, sawise sadurunge kasil dadi jawara Indonesia Super League (ISL) 2014.

Nanging emane, Piala Presiden ksb dadi gelar pung­kasan Persib nganti saiki. Senajan tetep ngukuhi saweneh­ing pilar utama, pelatih Djajang Nurdjaman gagal nguntap­ake Pangeran Biru dadi kang paling apik ing kompetisi jangka panjang Torabika Soccer Championship (TSC) 2016.

Nalika iku Persib finis ing urutan kalima jroning klase­men akhir kanthi ngumpulake 55 poin. Kacek 13 poin karo Persipura Jayapura kang dadi juara. Mudhune performa Persib dadi momok kanggone Arema FC kang dadi juara Piala Presiden 2017.

Arema menang 5-1 saka Pusamania Borneo FC ing laga final Piala Presiden 2017 kang digelar ing Stadion Pakansari, Kabupaten Bogor. Padha karo Persib, Arema uga ora bisa ngukuhi kekompakan sawise dadi juara Piala Presiden. Malahan, sang pelatih Aji Santoso mundur ing tengah dalan merga rumangsa gagal ngramu skuad kang diarep-arep Aremania.

Skuad Singo Edan finis ing urutan kasanga jroning kla­semen akhir Liga 1 2017 kanthi ngesaki 49 poin. Kacek 19 poin saka Bhayangkara FC kang dadi juara.

Sabtu bengi (17/2), Persija Jakarta aweh sukacita gedhe marang Jakmania lan sadhengah warga Ibukota. Kanthi main ing sangarepe 71 ewu pasukan oranye kang ngebaki tribun GBK, Ismed Sofyan sakancane menang 3-0 saka Bali United ing laga final Piala Presiden 2018.

Saikine, kasuksesan Macan Kemayoran ngundang sakehing pitakonan. Utamane ngenani prediksi skuad agul-agule Ibukota ing Liga 1 2018 kang bakal enggal diglin­dhingake maneh. Apa Persija nasibe bakal padha karo Per­sib utawa Arema? Utawa malah bakal dadi klub per­tama kang nyabet double winner? (d/ist)

 

Berita Terkait

Samak Minggu Ini

img

img

Sumber Semangat

Urip ing donya iki gawe kesel, merga akeh wong kang pengin mamerake bab-bab kang satemene dheweke ora nduweni.

Klik

BUKA PALING DAWA

Rekor buka pasa paling dawa ing donya, ana ing Hanover, Jerman mentas iki. Dawane nggayuh 10.2 km. Gunggung mejane 10.200 meja, lan sing melu buka ana wong 42.100. Acara iki wis kaca-thet ing Guiness Book Record. Iki nuduhake yen wong kang nggilut agama Islam ing Jerman saya akeh wae. (d/ist)

Pethilan

Janji-janji reformasi diajab enggal dicepetake

Janji kang dilalekake

Jamane reformasi wis 20 taun

KKN durung ilang uga

Bulog mesthekake stok beras aman nganti riyaya

Bab mundhak orane rega aja takon lo ya