Nyura - Sasi Sura
Diposting oleh : Administrator
Kategori: Banyumasan - Dibaca: 178 kali

Esuk-esuk mbekayu Romlah bojone kang Daryo  wis maring ngumahe Kaki Pujo, ponakane Kaki Bawor sing manggon jejer pager nang desa Jepara Wetan Keca­matan Binangun. Ndilalah sing mbukakna lawang si Ningsih anakke wadon Kaki Pujo, mahasiswa ISI Su­rakarta sing lagi preian. “ Lho kowe, Ning? Mboke ana?”

“Mpun kesah teng peken, Lik. Onten perlu kalih mboke, napa?”  wangsulane Ningsih karo males takon.

“Iya, jane arep takon mbokan egin duwe simpenan oyek, arep nempil, nek ana ya sing mandan akeh,” ja­­wabe mbekayu Romlah karo mesem digawe men keton sumeh.

“O, kadose onten. Ajenge kangge napa sih, Lik?” saurane Ningsih takon kepengin nggenahaken.

“Iya kiye kedah-kedahe ngrumati bojo. Likmu Daryo kae kocape saiki lagi nglakoni nyura, ora mangan sega. Mangane ya bangsane budin, munthul, besono apa buah. Wingi njajal tek tukokna inthil, lah jare enak tur awet warege. Mung sarapan inthil, bisa kuwat tekan sore,” critane mbekayu Romlah nggenahaken karepe.

Kebeneran Kaki Pujo ramane Ningsih krungu, sekang njero ngumah metu karo nggawa cething isi oyek. “Anane mung gari kiye, ngonoh digawa baen karo cethinge, Dhek.”  Bareng mbekayu Romlah gogoh-gogoh bentinge, gagehan Kaki Pujo menggak, “ Wis ora susah dibayar, gari digawa baen. Mung cethinge kuwe, ngesuk dibalekna.”

“O, ya kesuwun, Kang. Kepareng...”  Mbekayu Romlah enggal bali.

Gari Ningsih sing egin penasaran, njuran gagehan takon maring Ramane. “Jarene lik Romlah mau, Lik Daryo lagi nglakoni nyura, Jane anu nyura keprimen, Ramane?”

“Nyura kuwe laku tirakate wong Jawa sing egin nglestarekna adat budayane, niat ora mangan wohing dami sedawane wulan Sura. Lha sing diarani wohing dami kuwe ana pari, jagung, canthel, gandum lan se­jenise,” Kaki Pujo gole wangsulan karo mapan njagong nang risban, nyambi nglinting gawe ududan.

“Laku tirakat kaya kuwe diarani Ngrowot. Ya kuwe ngilari mangan panganan apa bae sing digawe sekang woh dami. Mulane padha ora mangan sega. Perlune padha prihatin, wetenge dilatih men ora kaget nek agi menangi peceklik, langka pari, sisan njaga ben koles­terole ora dhuwur. Ngemutaken uga, menawa pangan sing pokok kuwe ora mung sega. Ngrowot kuwe dilakoni suwene 30 dina, wiwit mlethek tanggal 1 nganti tanggal 30 Sura. Malah ana sing nganti 40 dina.”  Klilan.

Berita Terkait

Samak Minggu Ini

img

img

Sumber Semangat

Aja nganggep awakmu tansah salah, uga aja nganggep awakmu tansah bener.

Klik

KAYA JELI

Iki dudu plastik utawa ager-ager jeli, nanging iki bangsane iwak. Jelase iki Plankton kang wujude bening. Jeneng latine yakuwi Salp (Salpingo-oophorectomy) mujudake kewan kang nduweni kaunikan kanthi kulit transparan. Saking transparane, akeh wong ngira yen plankton iki plastik bening kang ngambang ing laut. (d/ist)***

Pethilan

Saperangan gedhe kabutuhan bawang putih diimpor

Petani wis biasa nangis bawang Bombay kok!

Sertifikasi tanah kuwi program nyata, dhawuhe Presiden

Dadi sing apus-apus sapa iki?

Wakil rakyat saya adoh saka rakyat

Saya adoh, menyang segara wae!