Bulutangkis, Momentum Gumregahe Olahraga
Diposting oleh : Administrator
Kategori: Pangudarasa - Dibaca: 97 kali

Badminton utawa bulutangkis, sawijining Olah Raga (OR) sing penggemaré Paling akèh nomer loro sawisé bal-balan ing Indonesia. Iki jalaran prestasiné naté onjo banget ing donya, diwiwiti taun 1960-an nalika Tan Yoe Hok lan Ferry Sonnevile naté mlebu all Indonesian final ing aréna All England; banjur negara kita bola-bali dadi juara Piala Thomas. Malah kita naté wani sesumbar, yèn bakal menang sau­pama diedu mungsuh sisa dunia, yaiku ing taun 1980-an nalika kita duwé the magnificent seven saéngga yèn tetandhingan ing piala Thomas, kita bingung anggoné milih dudu sapa sing kudu main, nanging bingung milih sapa sing ora ush dimainaké.

Nanging sawisé iku, muncul RRC – tilas muridé Indonesia- sing kebak pemain hébat, saéngga kita kaya-kaya mati suri, prestasiné saya mbleseg, senajan siji loro isih ana waé pemain sing onjo. Lan sajaké kahanan saiki iki wiwit gumrégah manèh, ndeleng prestasi ing Daihatsu Indonesia Master 2018. Keju­araan iki mlebu Super Series, najan posisiné ing level 4 World Tour BWF

Pelatnas PBSI ngirimaké wakil tunggal putra 4 ing kejuaraan iki, yaiku : Anthoni Sinisuka Ginting, Jonathan Christie, Ihsan Maulana Mustofa lan Firman Abdul Kholik. Ing partai Final ana 4 sing mlebu final, yaiku tunggal putra, gandha putra, gandha putri lan gandha campuran. Sidané ana loro sing kasil dadi juara, yaiku : Anthoni Sinisuka Ginting sawisé ngalahaké Kazumasa Sakai (Jepang) 21-13 21-12, lan gandha putra nomer 1 donya Kevin Sanjaya Sukamuljo lan Marcus Fernaldi Gideon sawisé ngalahaké Li Junhui lan Liu Yuchen (China) 11-21 21-10 21-16. Déné sing loro kalah, mung dadi runner up : Greysia Polii / Apriyani Rahayu dikalahaké Misaki Matsumoto / Ayaka Takahashi (Jepang) 17-21 12-21 sarta Tontowi Ahmad / Lilyana Natsir kalah mungsuh Zheng Siwei / Huang Yaqiong (China) 14-21 11-21

Kanthi olèh juara tunggal lan gandha putra, pasangan gandha putri lan gandha campuran sing gagal ora usah gela banget-banget, awit kita wis dadi juara umum ing kejuaraan iki. Nanging kita uga ora kena kliwat girang-girang gumuyu, jer ora suwé manèh kita bakal ngadhepi kejuaraan Piala Thomas lan Piala Uber sing bakal dianakaké ing Bangkok (Thailand) 20 – 27 Mei 2018 sarta Asian Games ka 18 ing Jakarta lan Palembang 18 Agustus – 2 September 2018.

Ing arena piala Thomas, symbol supremasi bulutangkis beregu putra donya iki, Indonesia terakhir dadi juara taun 2002, ateges 16 taun kepungkur. Déné piala Uber, symbol supremasi bulutangkis beregu putri donya, terakhir dadi juara taun 1996, dadi wis 22 taun kepungkur. Kita kudu éling yèn prestasiné para atlet ing cabang OR, ora bisa ujug-ujug kita asilaké. Kabèh mesthi ngliwati proses pembibitan, pembinaan terus menerus, pelatihan sing utun, terarah, ilmiah lan teror­ganisir saéngga bisa ngasilake prestasi sing unggul.

Mula momentum positif sing muncul ing Daihatsu Indonesia Master 2018 iki ora kena mung diliwataké ngono thok. Kemenangan lan gelar juara iki kudu dikemonah dadi energi positif lan optimisme jroning nggayuh prestasi sing maremaké. Umumé, OR sawijining negara bakal maju seiring karo kemajuan ekonomi negara ksb, awit sarana lan prasarana bisa luwih lengkap, uga kesejahteraané para atlet, official, kalodhangan berlatih lan latih tandhing uga bisa sumadhiya. Nanging nyatané, ing kalangan Asean waé prestasi OR kita isih tansah asor.

Kuduné, kejayaan lan prestasi bulutangkis kita bisa ditularaké marang cabang OR liyané, saéngga bisa saya maju. Pancèn iku dudu tugas sing ènthèng. Apamanèh ing arena multi event Asian Games taun iki kita wis nargètaké kudu sarwa sukses. Sukses jroning penyelenggaraan, bisa kasil ngrampungi masalah lan pelayanan, uga prestasiné, kaya wis digarisaké, kita kudu olèh peringkat kaping 8 utawa 9. mesthi waé kanthi taktik, teknik lan strategi, nanging tetep sportif.

Kita kudu sukses prestasi lan penyelenggaraan kanthi sportif sing laras karo watak lan jiwa ksatriya, ora sukses merga curang lan nakal. Kita kudu tetep kaya pedhoman OR : Vini, Vidi, Visi, sing ateges : Teka, Bertandhing lan Menang. (MW).

Berita Terkait

Samak Minggu Ini

img

img

Sumber Semangat

Urip ing donya iki gawe kesel, merga akeh wong kang pengin mamerake bab-bab kang satemene dheweke ora nduweni.

Klik

BUKA PALING DAWA

Rekor buka pasa paling dawa ing donya, ana ing Hanover, Jerman mentas iki. Dawane nggayuh 10.2 km. Gunggung mejane 10.200 meja, lan sing melu buka ana wong 42.100. Acara iki wis kaca-thet ing Guiness Book Record. Iki nuduhake yen wong kang nggilut agama Islam ing Jerman saya akeh wae. (d/ist)

Pethilan

Janji-janji reformasi diajab enggal dicepetake

Janji kang dilalekake

Jamane reformasi wis 20 taun

KKN durung ilang uga

Bulog mesthekake stok beras aman nganti riyaya

Bab mundhak orane rega aja takon lo ya