Durung Dhuel, Amir Khan vs Phil Lo Greco wis Panas
Diposting oleh : Administrator
Kategori: Olahraga - Dibaca: 437 kali

Amir ‘King’ Khan ora suwe maneh bakal dhuel lawan petinju asal Kanada, Phil Lo Greco, jroning pertarungan tinju kelas dunia. Kekarone petinju iki bakal padhadene gelut ing sandhuwure ring suwene 10 rondhe kang dianakake ing Echo Arena ing Liverpool, Inggris, 21 April 2018 mengko.

Nanging, jroning ngadhepi dhuel mau, malah kekarone petinju iki wis aweh tontonan panas. Ya, Khan kanthi sengaja nyiramake banyu menyang raine Lo Greco nalika sesi konferensi pers ing Liverpool, Inggris, dina Selasa 30 Januari 2018 mentas iki.

Uwal saka aksine Khan marang Greco, mula perlu dienteni sapa kang bakal dadi pemenang jroning dhuel kang satemene mengko. Kekarone petinju iki jelas bakal nuduhake kemampuane kang paling apik  amrih bisa methik kemenangan.

Khan kang mujudake mantan juara dunia kelas welter junior, sempat absen tampil ing sandhuwure ring meh rong  taun. Khan  nduweni julukan ‘King’ Khan. Dene Lo Greco mujudake petinju asal Kanada keturunan Itali. Petinju kelairan 6 Juli 1984 iki nduweni julukan The Italian Sensation.

 

Tidha-tidha

Sakawit, Greco satemene tidha-tidha nampa panantange Khan kang tarung ing kelas welter. Nanging, dheweke wusanane nampa tantangan mau kanthi bobot awake 147 pon. Kekakrone petinju iki bakal padha antem-anteman ing negerine Ratu Elizabeth.

Lo Greco wis nindakake olahraga tinju profesional kaping 31 sajege kiprahe ing sasi April 2006 kanthi oleh kemenangan TKO saka Derick Jones. Dheweke uga kasil ngukir 28 kemenangan, kang 15 ing antarane dipethik kanthi cara KO/TKO lan kang telu ngalami kalah.

Kekalahane Greco kedadeyan ing sasi Mei 2013 sarampunge dikon teluk dening juara tinju kelas welter, Shawn Porter. Sabanjure, Greco kalah kang kaping pindho saka Errol Spence Jr kang nalika kuwi statuse minangka juara kelas welter IBF. Dene sing keri dhewe, dheweke ngalami kekalahan sasi Juni 2016 saka Joseph Elegele ing Lakeland, Amerika Serikat.

Sauntara kuwi Amir Iqbal Khan mujudake petinju profesional Inggris. Nalika isih amatir , Khan tau menangake medhali perak ing divisi ringan ing Olimpiade 2004 , petinju kang kasil methik medhali emas tinju paling enom ing Inggris nalika umure 17 taun. Khan uga salah sijine juara dunia profesional paling enom Inggris, kang menangake gelar WBA nalika umur 22 taun.

Nalika wulan Juli 2011, International Business Times nyengkakake Khan minangka petinju aktif paling apik ka-8 dunia, pound for pound.

Khan lolos menyang Olimpiade Musim Panas 2004 kanthi finis ing panggonan pertama ing Turnamen Kualifikasi Olimpiade AIBA Eropa 2004 ing Plovdiv, Bulgaria . Dheweke mujudake siji-sijine perwakilan Inggris ing tinju ing Olimpiade Athena kang menangake medhali perak nalika umur 17 jroning kategori tinju ringan. (d)

Berita Terkait

img

Samak Minggu Ini

img

img

Sumber Semangat

Aja gumedhe mung merga ayu-ne rupa, amarga kuwi bakal luntur dening wektu. Nanging elinga, ayune kridha ora bakal luntur senajan digawa mati pisan...

Klik

NGANTUK

Ora kober ndlosor, semendhe ing tembok uga ora apa-apa. Mangkono mbokmenawa ujare si meong iki. (d/sit)***

Pethilan

Trilyunan rupiah dhuwit negara mili menyang desa

Koruptore aja nganti katut keli

Lumantar gerakan #2019Pilpres Ceria, Mahfud MD ngajak publik milih kanthi cerdas

Amarga kecerdasan kita wis saya ilang akibat memusuhan

Golkar ngukuhi caleg mantan koruptor

Ngajab para pemilihe padha pikun!