Jula - Juli 05 / 2015
Diposting oleh : Administrator
Kategori: Rena-rena - Dibaca: 277 kali

LA Nyala Mataliti Cagub Jatim sing wurung, ngaku yen rikala njaluk diungsung Gerindra dia-bani Prabowo dhuwit Rp 40 milyar. * Nasibe La nyala dadi gak menyala. Lan yen bener kandhane, Ketum Prabowo ketok anggone ngungsung jago ora legawa.

***

JARENE ICW, parpol sing njaluk mahar marang calon Kepala Daerah, adate sinamun kanthi istilah kanggo “uang saksi” ing Pilkada. * Saben ungsum Pilkada, parpol padha seneng mengada-ada, ora perduli si calon entek-entekan prasasat wuda.

***

MEGAWATI ora kurang stok, samundure Anas banjur digajuli kader PDIP sing trah Sukarno, Puti Guntur Sukarno. * Sajake Puti Guntur politisi sing wis gentur ta­pane, nadyan dudu lulusan Gontor ora gentar disurung mlebu sarange kaum sarungan (NU).

***

SAWISE Setya Novanto dadi tawanan KPK, Bambang Susatyo (Bamsut) Ketua Komisi III di­dhaulat Golkar dadi Ketua DPR. * Bam­bang Susatyo pancen bagus kaya bam­bangan, mula dadi Ketua DPR aja mbambung, mundhak rakyate malah bimbang.

***

BAMBANG Susatyo uga njamin, fraksi-fraksi DPR ora bakal ngrevisi maneh UU KPK nganti enteke mangsa jabatan Oktober 2019. * Muga Bambang Susatya tetep setya karo prasetyane. Yen ora, Bambang Susatyo ora ana bedane karo Bambang Gennn... tolet!

***

KPK antuk bukti yen sadurunge Setya Novanto tabrakan, pengacara Fredrich Yunadi wis pesen kamar ing RS Medika Permata Hi­jau. * Kaya pujangga wae. Yen weruh sa­durunge winarah, Yunadi kudune ganti jeneng: Raden Ngabei Rangga-Yunadi.

***

BUPATI Banyuwangi Azwar Anas kepeksa mundur saka Cawagub Jatim, awit ketaman kampanye hitam liwat foto-foto lawas. * Pamore Azwar Anas dadi lanas, kampanye hitam nggarahi gundam-gundam, yen ora sa­bar malah bisa naik pitam.

***

BECAK sing biyen dilarang Gubernur Ali Sadikin, dening Gubernur Anies malah arep dida-dekake angkutan lingkungan ing Jakarta. * Pikiran ora becik sing kepara becek. Salah-salah mengkone tukang becak karo tukang ojeg malah padha bacuk-bacukan.

***

GUBERNUR Anies Baswedan uga ndheseg BPN supaya mbatalake sertifikat pulo reklamasi, na­nging mentri Sofyan Djalil suthik ngla­deni. * Yen nganti dibatalake, pengem­bang bakal ngarani yen BPN kuwi mung: (B)adan (P)ertanahan (N)gaco.

***

NGADHEPI  Pilkada  Serentak 2018, Jusuf Kalla Ketua Dewan Mesjid Indonesia nglarang mes-jid dienggo kampanye. * Kala Pilgub DKI rumiyin, kampanye wonten mesjid Wa­pres Jusuf Kalla kalem mawon, satemah Ahok kalah ngantos kele-kele.

***

PARTAI Hanura pecah, kubu Ambhara sing diketuwani Daryatmo lumawan kubu Menhattan sing dipimpin ketua lawas OSO (Osman Sapta Odang). * OSO saiki malah dioso-oso ang­gotane, mangka mimpin Hanura-DPD sasat OSO ora kober ngaso.

***

DPD saiki dadi lembaga negara paling aneh. Ing atase dudu ajange politisi, saka 132 ang­gotane sing 70 padha mlebu partai Ha­nura. * Wolak-waliking jaman; sawise ana singkong rasa keju, kudu dimaklumi yen dinane iki banjur ana DPD rasa parpol.

***

SENADYAN diojoki Prabowo Ketum Gerindra, Yenny Wahid putrane suwargi Gus Dur emoh melu Pilgub Jatim, kuwatir gawe pecahe kaum nahdliyin. * Yenny Wahid pengin NU tetep rukun, saengga pangreka –daya– ne Prabowo kepeksa ora direken.

***

MENTRI Kelautan Susi Pudjiastuti judheg, presiden Jokowi ndhukung kapal maling iwak dikeremake, ning Menko Maritim Lu-hut Panjaitan nglarang. * Kapal maling iwak digawe kerem, Presiden Jokowi ma­rem. Ning Menko Maritim sing malah keram!

*** 

(GTS)

Berita Terkait

Samak Minggu Ini

img

img

Sumber Semangat

Urip ing donya iki gawe kesel, merga akeh wong kang pengin mamerake bab-bab kang satemene dheweke ora nduweni.

Klik

BUKA PALING DAWA

Rekor buka pasa paling dawa ing donya, ana ing Hanover, Jerman mentas iki. Dawane nggayuh 10.2 km. Gunggung mejane 10.200 meja, lan sing melu buka ana wong 42.100. Acara iki wis kaca-thet ing Guiness Book Record. Iki nuduhake yen wong kang nggilut agama Islam ing Jerman saya akeh wae. (d/ist)

Pethilan

Janji-janji reformasi diajab enggal dicepetake

Janji kang dilalekake

Jamane reformasi wis 20 taun

KKN durung ilang uga

Bulog mesthekake stok beras aman nganti riyaya

Bab mundhak orane rega aja takon lo ya