Jambore PKB Kanggo Ngundhakake Semangat lan Kreatifitas
Diposting oleh : Administrator
Kategori: Laporan - Dibaca: 46 kali

Mentas iki dianakake jambore kanggo kabeh Penyuluh Keluarga Berencana (PKB) Jawa Timur. Jambore kang dieloni PKB saka 38 kabupaten/kota se Jawa Timur mau dianakake telung rambahan yaiku ana Surabaya, Jember lan Batu, mapan ing pusdik militer/polisi. Ancase jambore iki kanggo ngunggar semangat lan kreatifitase para penyuluh sing kabiji katon kendho.

Mangkono pratelane Kepala Perwakilan BKKBN Jawa Timur Yenrizal Makmur nalika aweh sambutan ing pembukaan jambore mentas iki. Ditambahake, dinane iki jumlah PKB ing Jawa Timur mung kari 2.264. Jaman Pak Haryono Suyono ngasta Kepala BKKBN Pusat gunggunge PKB nyandhak wong 8000 ewunan luwih. Wiwit sepuluh taunan kepungkur PKB dilebokake dadi pegawai Kabupaten/kota, nganti seprene jumlahe ora tau tambah. Kepara akeh PKB kang dipindhah tugas ana kabupaten /kota lan pensiun. Mula ngadhepi era globalisasi iki, wiwit Januari 2018 PKB bali dikemonah dening BKKBN Pusat, nanging tugase tetep ana dhaerah.

Kanthi jumlah kecamatan ing Jawa Timur kang kehe 554 lan dumadi saka kelurahan/desa cacah 8.505, saengga saben PKB kudu mbina rata-rata patang desa/kelurahan. Kamangka umure PKB saiki rata-rata wis nyandhak seketan taun saengga yen wong siji ditugasi mbina KK cacah 5.200 katone kok dadi ora maksimal. Mula ora nggumunake manawa cakupan peserta KB saiki saya suda. Kamangka kang kudu dibina ing masyarakat kejaba masalah KB uga kelompok-kelompok kegiatan BKB (bina keluarga balita), BKR (bina keluarga remaja), BKL (bina keluarga lansia), Genre (generasi berencana) lan PIK R (pusat informasi komunikasi remaja) kejaba uga mbina kader-kader ing kelurahan lan desa minangka mitra.

Isih miturut Yenrizal Makmur, manawa migatekake asile uji kompetisi PKB se Jawa Timur kang dianakake ing wulan Nopember 2017, asile mrihatinake jalaran 61 persen PKB ing Jawa Timur ana ing kategori sangisore standar.

“Minangka salah sijine pambudi kanggo ngundhakake kreatifitas, wawasan lan mesisan aweh apresiasi lan nambah semangat para penyuluh KB, kita nganakake jambore iki. Kita sengaja milih ing papan pendidikan militer,” mangkono Yenrizal Makmur nalika aweh sambutan ing pembukaan jambore kang dianakake ing Secaba Jember mentas iki.

Jambore ing Secaba Jember kejaba dianakake seminar saka nara sumber ahli uga pendidikan kedisiplinan kang dipandu dening para pelatih Secaba Jember. Ing kalodhangan kasebut uga dianakake lomba kreatifitas penyu­luhan KB kanthi manfaatake kesenian dhaerah saengga suwasana jambore katon regeng lan gayeng. (Art).

 

Berita Terkait

img

Samak Minggu Ini

img

img

Sumber Semangat

Urip iki cekak banget yen mung trima diisi karo rasa gela lan benci.

Klik

TRADHISI KAUL LAN ABDA’U ING MALUKU TENGAH

Iki sawijining tradhisi mbeleh wedhus ngarepake Idul Qurban. Ditindakake kaping pindho, yakuwi sing umum sawise shalat idul adha, lan ana maneh sing khusus. Sing khusus kanthi mbeleh wedhus 3. Sadurunge dibeleh, tetelune wedhus iki digendhong jarit dening tetuwane adat lan diarak keliling sinambi sholawatan nuju pelataran masjid Negeri Tulehu sawise Ashar. Tujuane ritual iki kanggo tolak balak lan nyenyuwun panga-yomane Gusti Allah kanggo masyarakat Tulehu. (d/ist)

Pethilan

Polri wiwit ngrasakake anane konflik pemilu

Digulung wae pak

Pasangan capres-cawapres setuju pemilu dhame

Pendhukunge sing dikon gontok-gon­tokan

Capres-cawapres nyiapake tim sukses

Sukarelawan, nanging ana pamrih