Nonton Hari Jadi Kabupaten Purbalingga
Diposting oleh : Administrator
Kategori: Banyumasan - Dibaca: 57 kali

Bareng tekan Pos Kamling kaki Bawor mandan kaget, mergane anggota regune wong lima wis kumpul kabeh. Guru Tarno, Kebayan Dikin, Darman Betor, Yamun si bujang tuwa, karo Pak Priyanto Pensiunan PNS.

“Eh, ora taune wengi kiye sing mangkat rondha kumplit koh. Tiwase mung nggawa wedang thok, je,” ujare Kaki Bawor karo ngulungna ter­mose, enggal di tampa Yamun, langsung bae dithorna maring gelas nem sing wis di tata nang baki cilik, nggo medangan. 

“Ya ora apa - apa, Ramane. Kebeneran Pak Priyanto ngasta mendhoan egin manget-manget kiye, bu Priyanto sing nggoreng dhewek. Jare men­dhoan asli ulih-ulih gole tindakan sekang Braling,” semaure Kebayan Dikin karo nyomot mendoan nang piring.

“Eh, ya syukur. Ora koh, pak Priyanto wingi gole tindakan maring Purbalingga kayonge betah temen. Nganti suwe ora bali-bali,” takone Kaki Bawor maring Pak Priyanto, karo tangane nyandhak gelas, terus nyruput wedang kopine.

Sing nyauri malah Mas Guru Tarno, karo nampani gelas kopine sekang tangane Yamun. “Arep ora betah kepriwe, Ramane, wong kejaba plesiran sireng-sireng, kebeneran nang Purbalingga agi rame-rame akeh tontonan.”

“Iya, inyong krungu jare Kabupaten Purbalingga agi mengeti hari jadi, sing kaping 187, tanggal 18 Desember 2017 winginane, nganakna akeh tontonan wiwit tanggal 7 tekan tanggal 31 Desember 2017,” sau­rane Darman Betor karo tangane ora keri nyemol mendoan, langsung dipangan.

“Deneng rika ngerti?” takone Yamun penasaran. “Iya, ngerti lah. Anu maca nang spandhuk, dhong anu pas liwat Purbalingga,” saurane Darman Betor karo nyamuk-nyamuk gole mangan mendhoan.

“Mumpung anak putu padha preian, Kang Bawor. Pancen sengaja tek sengi tilik silahturahmi maring dulur-dulur sing egin ana nang Purba­lingga, ujube nyambung balung pisah, ben ora kepaten obor,” wangsu­lane Pak Priyanto karo mapanaken gole njagong sila methengkes. “Lha kebeneran pancen Kabupaten Purbalingga agi ana rame-rame, mengeti Hari Jadi sing kaping 187, Tanggal 18 Desember 2017 wingi. Dadi ya si­san nonton pirang-pirang kegiatan, ana pameran, festival tumpeng, parade budaya, lan sawernane pentas seni tradisional, seni musik karo ndhangdhut. Jan rame pisan. Ningen inyong kan gole mangkat meng Braling kae tanggal 16 Desember 2017, dadine ya inyong gole nonton ya tontonan sing ana wiwit tanggal 17 tekan tanggal 31 Desember 2017.  Mulane dadi betah.”

“O, dadine Pak Priyanto gole malem tahun baruan, nang Purbalingga, yah?” Kebayan Dikin melu takon nyelani.

“Ya iya lah. Genah dhong pas malem taun baru wingi, inyong pancen ngoberna nonton wayang kulit sewengi nutug tekan esuk, nang GOR Guntur Daryono. Ora ngertia bar kuwe,awak kayong dilolosi otot balunge, sidane ya ambruk, mriyang nganti limang dina. Dadi gole bali ngeneh kepeksane ya mundur.” 

Kaki Bawor nyauri karo menjep “Hi..hi.. Anu balung tuwa. Melek sewengi ya mriang lah.. Mayuh lah mangkat mider, karo njikoti jimpitan, wis wengi koh. Inyong karo Yamun sing mlaku ngalor, Kebayan Dikin karo Darman mlaku ngidul. Mengko ketemu nang ngarep umahe Baune Na­siran. Pak Priyanto karo Mas Guru Tarno ben nangkene baen, tunggu Pos Kamling. Mangga. Klilan...

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan