Marta Kostyuk, Petenis Ukraina 15 Taun Iki Ngukir Sejarah ing Australia Terbuka
Diposting oleh : Administrator
Kategori: Anyar Katon - Dibaca: 39 kali

Marta Kostyuk ngukir rekor ing Australia Terbuka. Petenis Ukraina umur 15 taun iki dadi pemain tenis putri paling enom kang lolos babak katelu turnamen tenis grand slam.

Tampil ing babak loro ing Margaret Court Arena, rebo kepungkur (17/1/2018), Kostyuk kasil methik kemenangan. Dheweke ngalahake petenis Ustrali, Olivia Rogowska, kang tampil liwat wildcard, kanthi skor 6-3, 7-5.

Sing nengsemake, Kostyuk ngukir sejarah sarampunge dhuel mau. Ora ana kang ngira asil iku nganti pertandingan rampung lan dibacutake wawancara. Kostyuk, kang lair ing tanggal 28 Juni 2002, dadi petenis putri paling enom kang lolos babak katelu ing turnamen grand slam sajege Mirjana Lucic-Baroni ing Amerika Terbuka 1997 lan mesisan dadi kang paling enom ing Australia Terbuka sawise Martina Hingis ing taun 1996.

Penampilan Kostyuk oleh pujian saka lawane, Rogowska, kang saiki umur 26 taun. Dheweke nganggep Kostyuk mujudake pemain mangsa tembe.

“Dheweke bakal dadi pemain kang mbebayani mengkone,” ujare Rogowska kaya ditulis Sydney Morning Herald.

Ing babak telu, Kostyuk bakal ketemu sapadha-padha petenis Ukraina, Elina Svitolina. Dhuel iku dinuga cukup abot kanggone Kostyuk, ngelingi Svitolina tampil minangka unggulan kapapat.

“Aku beja temen aku tandhing ing final Rod Laver taun kepungkur (junior). Lan, aku ngerti piye kudu main ing sawijining lapangan kang istimewa iki. Aku rada kangelan ing awal pertandingan nanging dudu bab tembakan, luwih-luwih ing servis,” ujare Kostyuk marang BBC.

Wozniacki Main kanthi Dramatis

Sauntara kuwi pemain tenis asal Denmark, Caroline Wozniacki, kanthi dramatis maju menyang babak katelu Austarlia Open 2018 kang dianakake ing Rod Lover Arena, rebo wingi (17/1/2018). Petenis unggulan loro iku kasil mlangkah menyang babak katelu sarampunge nelukake Jana Fett asal Kroasia kanthi skor tipis 3-6, 6-2 lan 7-5.

Dhuel sengit kedadeyan nalika set katelu, Wozniacki ketinggalan 1-5 saka Fett. Nanging ajaibe nalika siji mbaka siji, petenis umur 27 taun iku bisa nyusul Fett nganti madhak­ake skor 5-5 lan menangi pertandhingan kanthi skor akhir 7-5.

 “Aku nyoba mikir nalika dheweke isih kudu menangake patang bal maneh kanggo menangake pertandingan iki. Aku ora oleh ndadekake dheweke gampang. Aku mikir ora menehi dheweke kemenangan,” jlentrehe Wozniacki.

“Nalika aku kasil gawe skor dadi 5-2, aku kandha, oke aku isih urip. Dheweke isih nduweni patang bal maneh kanggo bisa menang. Nanging aku kaya sadurunge tetep nyoba lan tetep agresif,” tambahe.

Wozniacki uga ngaku seneng bisa nuwuhake ‘kebang­kitan’ luar biasa. Sebab lawane mau kari nyathet sak poin wae, dene dheweke kudu berjuang ekstra keras amrih bisa madhakake posisi. Wozniacki uga ngaku nyoba terus fokus supaya bisa menangi dhuel mau.

“Aku mongkog banget kanthi caraku gumregah. Iku mesthi angel banget. Jelas dudu pertandinganku sing paling apik, utamane ing kawitan. Kondisine beda banget. Aku mung nyoba tetep fokus, nyoba mainake permainanku. Iku angel banget, lan dheweke uga main apik,” bacute.

Ing babak katelu, Wozniacki bakal nga­dhepi unggulan ka-30 yakuwi Kiki Bertens. Pemain tenis asal negara Landa ksb gemlin­dhing tekan babak katelu sarampunge nelukake Nicole Gibbs asal Amerika Serikat kanthi skor 7(7) - 6(3) lan 6-0.

(d/ist)

Berita Terkait

Samak Minggu Ini

img

img

Sumber Semangat

Yen kita ora bisa ngajeni, mula aja tau ngina.

Klik

KENYA MAIN TONG SETAN

Pemain tong setan biyasane wong lanang, nanging ing kene sing main sawijining wanita yakuwi kang jenenge Karmila Purba. Kenya umur 18 taun asal Pematang Siantar, Sumatra Utara iki cukup kondhang ora mung ing Indonesia, nanging uga ing donya. Iki gara-garane merga aksine diliput dening media asing yakuwi Guardian lan Metro. (d/ist)***

Pethilan

Presiden mundhut motor Royal Enfield Bullet 350 cc

Dadi kelingan esemka…

Tata kelola anggaran olahraga ala

Sabandhing lurus karo prestasine

Kabeh calon kepala daerah nyerahake LHKPN

Perkara datane bener apa ora uru­san mburi