Kali Pegirian Dikeruk Merga Ambune Banger
Diposting oleh : Administrator
Kategori: Yak Opo Kabare - Dibaca: 128 kali

Warga pinggir kali Pegirian ing wewengkon Jalan Wono­sari, Minggu (14/1) padha ngumpul. Dheweke kabeh ngumpul ndeleng Wali Kota Su­rabaya Tri Rismaharini dalah andhahane padha nindakake kerja bakti ngeruk kali Pegirian.

Kali Pegirian iki klebu laladan sing arang antuk kawigaten saka Pemkot Surabaya, mula ora nggumunake kegiyatan ka­sebut dadi tontonane warga ngenggon.

Salah sawijining warga Jalan Wonosari ngandhakake, wis suwe kali iki reged lan ambune banger. “Yen udan ambune ngambra-ambra ndadekake kudu mutah. Jalaran sampahe akeh, banyune rupane nganti ireng,” kandhane.

Ora marem marang kegi­yatane andhahane, Wali Kota sing nate nampa penghargaan Sustainable City and Human Settlements Award (SCAHSA) 2017 kanggo kelompok Global Green City saka Perserikatan Bangsa-Bangsa (PBB) iki ke­peksa melu mudhun lan nga­wat-awati langsung resik-resik kali Pegirian kasebut.

Sakehing pasukan saka Dinas Kebersihan dan Ruang Terbuka Hijau (DKRTH) sarta Dinas PU Bina Marga dan Pe­matusan dikerigake kanggo resik-resik wewengkon kali iki.

Kepala Dinas PU Bina Marga dan Pematusan Surabaya Erna Purnawati ngandhakake, kali iki wis rong taun ora nate dikeruk. Mula saka iku, wiwit wiwitan sasi Januari 2018 Pemkot Surabaya nganakake pengerukan.

“Wis wiwit wiwitan sasi Januari dianakake pengerukan, jalaran nep-nepan lendhute wis watara pitung sentimeter. Kita wis antuk lendhut 500 dump truk,” jlentrehe Erna.

Manut tambahe, penge­rukan iki isih terus ditindakake engga nep-nepan lendhut ka­sebut entek. Ana alat berat limang unit sing dikerigake wiwit esuk, kanggo nyepetake ngangkat nep-nepan ing njero kali.

“Truke uga antri ngemot lendhute. Lendhut iki dibu­wang menyang wewengkon Tambak Wedi kanggo lemah urug lapangan tembak,” ujare Erna.

Ing kalodhangan iki Risma sajak nesu weruh tumindake warga sing isih sakarepe dhewe mbuwang sampah menyang kali. Mula iku, Risma ngajap marang RT lan warga supaya ora mbuwang sampah me­nyang kali maneh. Pehake wis nyepakake sakehing tong sam­pah. Malah, cacahe uga ditam­bah. Gunggunge ana 50 tong sampah karet didumake ma­rang warga ngenggon. “Ana tong sampahe. Yen ngisore (kali) isih reged, Pak RT sing dakcekel,” tandhese Risma.

Dina iku Risma uga melu ngawat-awati pamasange pe­nerangan jalan umum (PJU). Menganggo klambi bathik ungu campuran abang enom, dhe­weke ora wigah-wigih melu ngecet pagere kreteg sing nya­brang kali kasebut. Risma nga­jap tumindake warga bisa owah lan luwih gatekan marang ka­resikan lingkungane.

Kabid Kebersihan DKRTH Agus Hebi ngandhakake, upaya reresik lan ngapiki lingkungan tansah ditindakake. Saliyane panggonan bermain anak-anak, sakehing fasilitas kebersihan melu ditambah.Yaiku nambah udakara 20 unit kontainer sam­pah sing bisa momot 1 meter kubik. Kontainer iku dipapan­ake ing panggonan-panggonan sing kira-kira sampahe akeh. “Diseleh ing pucuk-pucuking gang, supaya warga ora mbu­wang sampahe menyang kali,” tandhese.

Salah sawijining warga Wonosari Gang 1ngandhakake yen pihake sajak marem ma­rang upayane Pemkot Suraba­ya anggone resik-resik kali Pe­girian iki. Sebab kahanan ling­kungan wewengkon iki wis su­we reged. “Warga seneng ana kegiyatan kebersihan iki lan ana penghijowan. Luwih resik lan nyaman,” kandhane sajak bu­ngah. (Bsh)

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan