Waspada Marang Ancamane Narkoba Jinis Anyar
Diposting oleh : Administrator
Kategori: Anyar Katon - Dibaca: 29 kali

Sasuwene taun 2017 wingi Badan Narkotika Nasional (BNN) nemokake anane narkoba jinis anyar lan sawetara ing antarane wis ana sing mlebu menyang Indonesia. Kepala BNN Komjen Pol Budi Wasesa ngandharake yen ing antarane 800 narkoba jinis anyar sing dilaporake ing ndonya, 68 jinis ing antarane ditemokake ing Indonesia. Ing antarane 68 narkoba kasebut lagi 60 sing mlebu Undang-Undang Kesehatan, lan 8 jinis liyane durung mlebu UU Kese­hatan. Nanging Budi Wasesa suthik nyebutake mbaka siji apa wae narkoba jinis anyar kasebut. Luwih-luwih ngenani 8 nar­koba jinis anyar sing durung klebu UU Kesehatan. Budi Wasesa mesthekake 68 narkoba jinis anyar kuwi nyata-nyata anyar. Ora mung modhele nanging uga bahan-bahane.

“Iki nyata-nyat jinis anyar, dudu modhel anyar. Yen modhel anyar kaya sing kita grebeg ing diskotek MG wingenane, ekstasi sing biasane tablet nuli dicairake engga satleraman katon kaya inuman mineral biasa,” jlentrehe Budi Wasesa nalika nindakake press reliese ing kantor BNN pungkasan sasi Desember kepungkur.

Kari-kari iki media sosial (medsos) diumyegake dening anane unggahan video sing nuduhake sawenehe priya kena pengaruhe narkoba jinis anyar sing disebut “Flakka”. Priya sing kena pengaruhe flakka kuwi polahe ora karuwan. Pan­dulune kosong lan uga nggereng-nggereng ngamuk, kawitane BNN durung bisa nemtokake flakka kuwi klebu narkoba jinis anyar sing kasil mlebu menyang Indonesia apa ora. Jalaran barang haram kuwi bisa ganti jenenge nalika mlebu menyang sawijine negara utawa dhaerah, nanging sawise ditindakake uji panaliten ing laborat jebul flakka kuwi wis mlebu menyang wilayah Indonesia. Miturut Budi Wasesa, flakka nduweni efek sing cukup kuwat. Wong-wong sing kena pengaruhe flakka ngrumangsani yen dhirine ora kaya manungsa, lan ora beda kaya wong edan.

 

Obat Zombie

Narkotika jinis flakka sing ditemokake BNN wujude serbuk, ngandhut bahan senyawa aktif kimia alpha-PVP. Zat iki sti­mulan utama sing bisa ngrangsang munggahe hormon do­pamin, sajinis neurotransmiter ing utek, yen gunggunge sing dikonsumsi kakehan bisa ngakibatake rasa seneng sing sarwa linuwih, agresivitas dhuwur, nganti ora sadhar. Efek sam­ping flakka meh presis karo narkoba jinis kokain lan amfetamin. Ing jangka pendek, pengguna sing kecanduan flakka ngalami euforia sing linuwih, ketege jantung luwih cepet, tekanan getih munggah lan prilaku waspada sing ora samesthine. Efek liyane sing luwih nggegirisi yakuwi akibate marang ginjel. Zat sing tinemu ing narkoba kasebut bisa njalari otot tansaya lemes lan ndadekake badan ngalami hiper­termia.

Flakka utawa sing uga disebut “obat zombie” (mayit urip) wis sumebar ing sawetara negara gedhe lan nuwuhake keru­suhan ing kalangan masyarakat papane obat kuwi sumebar. Kaya video sing diunggah ing medsos, obat iki bisa marakake pecandune duwe respon agresif sing kliwat wates. Pecandune bakal jerit-jerit, polah, mberot, malah natoni awake dhewe nalika “kerasukan” flakka. Malah ana kasus pecandu flakka nabrakake dhewe marang mobil sing mlaku banter. Akibate dheweke lan sopire nandang tatu-tatu. Pecandu narkoba zombie iki uga duwe rasa kepingin natoni liyan ing sacedhake, tanpa melu sapa wong kuwi. Akeh-akehe pecandu flakka bakal kelangan kontrol lan nyerang wong sing cedhak karo dheweke.

Miturut panemune ahli Epidemiologi lan Penyalahgunaan Narkoba ing Nova Southeastern University, Fort  Lauderdale, Florida kang aran Jim Hall, obat sintesis iki wis dilarang wiwit taun 2012. Jalaran dosise sing angel ditemtokake lan dikendhaleni yen pengguna kakehan flakka bakal kelangan kontrol lan malih dadi agresif, suhu badane pecandu flakka bakal mundhak dadi 105 derajat celcius, lan bakal ngalami paranoia sing kliwat wates. Efek liyane tumrap pecandu flakka yakuwi ora bakal bisa ilang senajan penggunane wis ora ngonsumsi obat kasebut. Sejene kuwi bisa ngrusak ginjel lan otot.

“Wis akeh crita ngenani akibate flakka. Ana sing jerit-jerit ing tengah dalan lan kandha yen dheweke kuwi setan,” kandhane Jim Hall lumantar CNN.com.

Aran flakka sangkane saka basa Spanyol sing tengese wong ayu (la flakka), ngandhut senyawa kimia sing disebut MDPV. Senyawa iki menstimulasi bagean uteg sing ngatur mood, hormon dopamin, lan serotonin. Sauntara kokain lan methamphetamine duwe cara kerja sing padha ing uteg, nanging senyawa kimia ing flakka ninggalake efek sing tahan suwe najan wis ora dikonsumsi. Senajan efek kaya sakau sing dituwuhake flakka mung sawetara jam, nanging klakon sacara permanen ing njero uteg. Ora mung manggon ing uteg, obat iki uga bakal ngancurake uteg.

Babagan liya sing kudu diwaspadai, flakka bisa nyebabake efek samping sing banget ngancam kasehatan ginjel. Minangka akibat saka hipertermia, flakka uga bisa njalari otot-otot pecah. Para ahli kuwatir yen para pengguna flakka sing overdosis bakal nglakoni dialisis selawe urip. Ora beda kaya obat-obatan sintetis umume, sabageyan gedhe flakka dinuga teka saka China lan didol lumantar internet. Flakka didol luwih murah tinimbang regane kokain.

“Wong sing adol flakka milih para remaja miskin sing didadekake target, malah njaluk para tunawisma murih gelem dadi pengedare,” tandhese Jim Hall. Senajan Drug Enforcement Administration wis nglarang peredaran flakka, ning isih meksa ana sing bisa ngedharake.

“Bisa wae ing label obat diwenehi tulisan ora dikonsumsi kanggo manungsa” kandhane Lucas Watterson, sawenehe peneliti pascadoktoral ing Pusat Penelitian Penyalahgunaan Zat ing Temple Unervisity School of Medicine. Masalahe saiki yakuwi nalika salah siji obat dinyatakake ilegal utawa dilarang, produsen obat banjur ngrespon kanthi mrodhuksi sawetara obat alternatif sing wangune utawa jinise beda.

 

Magic Mushroom

Nalika BNN nindakake penggledhahan ing diskotek MG Club Internasional ing Jakarta Barat sasi Desember wingi, ditemokake narkoba cair sing diwadhahi botol-botol tilas wadhah banyu mineral. Narkoba cair kasebut dinuga banget ngedab-edabi tumrap penggunane jalaran ngandhut Amfetamin lan Metamfitamin. Saben sabotol bisa diombe dening wong papat, regane watara 300-400 ewu rupiah. Akibat sawise ngombe narkoba cair cukup suwe, bisa nganti 24 jam. Miturut Kepala BNN DKI Jakarta Brigjen Pol Johnny Latupeirissa, kanggo pikantuk narkoba cair kuwi sing tuku kudu duwe member (kertu pelanggan). Ing penggrebegan lan penggledhahan kuwi 120 wong sing ana ing MG Club dinyatakake positif pengguna narkoba, lan ditahan ing BNN pusat kanggo pameriksaan sing sabanjure.

Siji maneh kasus jinis narkoba anyar sing kasil dibongkar aparat yakuwi Magic Mushroom. Petugas Direktorat Tindak Pidana (Dirtidip) Narkotika Mabes Polri kasil mbongkar praktek dol tinuku Magic Mushroom ing Lembang, Bandung, Jawa Barat. Barang bukti bobot 51 kilogram lan tersangka aran Eddy Haryono alias Cyan (52) diamanake menyang Mabes Polri. Priya kasebut akhir-akhir iku disumurupi adol narkotika jinis anyar sacara online. Dirtipid Narkotika Mabes Polri, Brigjen Eko Daniyanto ngandhakake yen masyarakat aweh informasi ngenani anane dol tinuku narkoba jinis anyar kasebut lumantar internet. Sawise pikantuk informasi kasebut langsung disiapake tim kanggo mbongkar peredaran narkoba jinis anyar kuwi.

Sawise meh rong sasi nindakake panyelidhikan, petugas enggal nggrebeg Eddy ing omahe. Kawitane petugas nyoba pesen narkoba kuwi secara online, saka cara iki bisa dipikantuk alamate sing dodol lan ditindakake penggerebegan. Eddy kasil dibikut tanpa nglawan, ing penggrebegan kasebut petugas uga kasil ngamanake sawetara bukti antaraliya 51,4 kilogram narkotika sing dumadi saka 47,4 kilogram Mushroom mateng lan siap dikonsumsi sarta 4 kilogram mushroom mentah. Kajaba saka kuwi uga disita timbangan, alat pres, ponsel loro, lan buku rekening loro. Merga tumindake kuwi Eddy Haryono alias Cyan dijiret pasal 112 ayat (2) Undang-undang Nomor 35 taun 2009 ngenani narkotika kanthi inciman ukuman kunjara lima nganti 20 taun.

l (Oemaryanto)

 

Berita Terkait

Samak Minggu Ini

img

img

Sumber Semangat

Yen kita ora bisa ngajeni, mula aja tau ngina.

Klik

KENYA MAIN TONG SETAN

Pemain tong setan biyasane wong lanang, nanging ing kene sing main sawijining wanita yakuwi kang jenenge Karmila Purba. Kenya umur 18 taun asal Pematang Siantar, Sumatra Utara iki cukup kondhang ora mung ing Indonesia, nanging uga ing donya. Iki gara-garane merga aksine diliput dening media asing yakuwi Guardian lan Metro. (d/ist)***

Pethilan

Presiden mundhut motor Royal Enfield Bullet 350 cc

Dadi kelingan esemka…

Tata kelola anggaran olahraga ala

Sabandhing lurus karo prestasine

Kabeh calon kepala daerah nyerahake LHKPN

Perkara datane bener apa ora uru­san mburi