Woh-wohan Misuwur, Warga Tansaya Makmur
Diposting oleh : Administrator
Kategori: Pangudarasa - Dibaca: 83 kali

Woh pelem, mesthi kabeh wis padha wanuh. Semono uga apokat/alpukat. Lelorone bisa dirahabi langsung, utawa digawe jus. Uga, bisa diimbuhi woh-wohan liyane, digawe es buah. Nanging sing lagi rame dadi pocapan durung suwe iki yaiku kombinasi woh kasebut. Kawentar kanthi aran mangga alpukat. Mesthi wae pawarta kasebut gawe cingake ngakeh.

Sing rame dibiwarakake, woh jinis iki wujude pelem, ananging yen arep mangan ora dionceki kaya adate. Pelem cukup diiris mubeng perangan tengahe banjur dibukak. Daging wohe disendhoki, kaya dene yen mangan alpukat. Rasane? Legi kaya umume pelem.

Pranyata sejatine woh iki ya jinis pelem wae, ora ana ambu lan rasane apokat babar pisan. Mujudake campuran (silang) pelem gadhung lan arumanis, diupakara kanthi becik lan saben wohe diundhuh yen wis mateng tenanan (tuwa ing uwite). Kanthi mangkono, sontrot ing wohe lembut banget, lan daging wohe empuk. Mula, bisa dibukak kayadene apokat lan gampang disendhoki.

Mangga alpukat bisa didol kanthi rega Rp 30.000,- sijine. Dene yen tuku sakdhus, rongatus seket ewu, entuk 5 kg. Cetha matikel-tikel saka rega pelem gadhung arumanis umume.

Bab iku mbuktekake yen sawijining paraban bisa ngundhakake reregan. Apamaneh, kaya pradatan jaman saiki, disengkuyung pambiwara sing mirunggan. Ana foto cetha lan narik kawigaten, diimbuhi pawarta tharik-tharik sing nuwuhake penasaran.

Yen ngelingi maneh sawetara taun sing keri iki, ana woh liyane sing uga dadi kawentar. Yaiku “buah naga”. Woh sing asline karan “pitaya” iku ndhisike saka Meksiko, Amerika Tengah, uga Amerika Selatan. Mujudake salah sijining jinis kaktus sing bisane urip ing papan panas lan garing. Ing Nuswantara mbiyene mesthi wae langka, lan yen ana, larang regane.

Saiki, ora mung saperangan Asia, nanging ing Indonesia uga wis akeh kadang tani sing mbudidaya tuwuh tumangkare woh kasebut. Wewujudane woh iku, kulite abang lan ana kaya sisike naga. Mula lumrah yen diparabi “buah naga” utawa “dragon fruit”.

Dinane iki, buah naga wis akeh sumadya ing saindenging Nuswantara. Mula, wis ora dadi woh-wohan sing larang maneh. Aja kok toko buah utawa supermarket, ing pasar-pasar cilik uga pinggir dalan akeh sing dodol. Yen ngepasi ungsum panen, regane jian murah. Malah, Indonesia wis wiwit bisa adol menyang njaban rangkah, alias ekspor.

Pancen, strategi promosi sing kreatif kaya nawakake mangga alpukat iku, wis samesthine disengkuyung kwa-litas prodhuk sing peng-pengan. Sawise narik kawigaten masyarakat kanggo sing sepisanan, kaajap sabanjure antuk pelanggan. Ora mung santer lan laris sakeplasan.

Ngelingi munggah mudhune sarta ubenging “pasar” jaman saiki sing sarwa kilat, pebisnis kudu nduwe rancangan-rancangan bacute sing ora kalah hebat. Kena tetep mlaku dhewe, nanging uga bisa memitran karo pebisnis liyane, sing laku dagange padha utawa seje.

Yen bisa njamin asile woh sing gandhes, bisa dadi srana ekspor menyang sakehing negara. Dene yen olehe promosi pinter lan antuk mitra sing pener, laku dagange ing Nuswantara uga bakale tansaya santer. Sing dagang wis mesthi tambah murwat. Dene warga, bisa njaga badan sehat kacukupan woh-wohan sing ngandhut serat, para kadang tani muga-muga uga bisa mundhak asil pametune, tentrem uripe, kabul olehe nduweni kajat. (lie)

Berita Terkait

Samak Minggu Ini

img

img

Sumber Semangat

Aja nganggep awakmu tansah salah, uga aja nganggep awakmu tansah bener.

Klik

KAYA JELI

Iki dudu plastik utawa ager-ager jeli, nanging iki bangsane iwak. Jelase iki Plankton kang wujude bening. Jeneng latine yakuwi Salp (Salpingo-oophorectomy) mujudake kewan kang nduweni kaunikan kanthi kulit transparan. Saking transparane, akeh wong ngira yen plankton iki plastik bening kang ngambang ing laut. (d/ist)***

Pethilan

Saperangan gedhe kabutuhan bawang putih diimpor

Petani wis biasa nangis bawang Bombay kok!

Sertifikasi tanah kuwi program nyata, dhawuhe Presiden

Dadi sing apus-apus sapa iki?

Wakil rakyat saya adoh saka rakyat

Saya adoh, menyang segara wae!