Wayah sore Kaki Bawor jagongan nang risban ngarep umah, medang kopi lawuhe balokan, sinambi rengeng-rengeng, ngeling-eling sulukan wayang Banyumasan. “Jleg tumurun saking tepa­sana, ngagem gamparanira gadhing... Mayar-mayar kanthi winam­buh. Busana sutra maneka... Lungsir balungsir kuning. Ja­mang, tundha tiga... Tah-utahan sinangga praba. Sang nata tindaknya alon..., o...”

Mas Gathot tangga nunggal RT sing bukak warung internet nang pinggir gili gedhe, ngrungokna karo gedheg-gedheg mandan gumun, jane gole teka kawit mau, sidane alok, “Wah jan, ora ngira nek ramane teyeng suluk maen pisan. Miki suluk cara ngendi, ramane? Inyong kayong nembe krungu.”

“Eh, kowe,Thot? Gawe kaget bae lhuh. Maen kepriwe? Anu suwarane wong tuwa, ya akeh blerone. Inyong agi ngemut -emut sulukan gagrag Banyumasan, sing gemiyen tau disusun nang para dhalang asal tlatah Banyumas,” saurane Kaki Bawor, karo ngakon mas Gathot supaya lungguh nang risbane.

“O, dadi miki kuwe agi nembangaken suluk Banyumasan, yah Ramane? Inyong nembe tau krungu kiye,” ujare mas Gathot karo mapan njagong. “Kayonge dhalang-dhalang nom saiki ora tau suluk sing kaya kuwe lhuh.”  

Kaki Bawor ngunjal ambegan, “Lha, ya kuwe sing marakaken inyong prihatin. Padhahal nggo nyusun Pathokan Pedhalangan gagrag Banyumasan kuwe gemiyen, nang antarane tahun wolung puluhan, wis mesthi nganggo meres pikiran, tenaga lan biyaya sing ora sethithik. Nek ora salah gemiyen sing nangani sekang Yayasan Senawangi, pimpinane almarhum Bapak Brigjen Supar­tono Brotosuhendro. Direwangi para dhalang lan pengurus Gana­sidi sekang Kabupaten Banjarnegara, Purbalingga, Banyumas lan Cilacap. Akeh dhalang sepuh sing saiki racake wis padha almar­hum, kayata Ki Suyud sekang Somagedhe, Ki Surono karo Ki Nyana sekang Banjarnegara, Ki Taram Tarjoharsono lan Ki Tjipto sekang Kroya, Ki Sugir sekang Bangsa Kebasen, Ki Sugito Pur­bocarito lan Ki Sugino Siswocarito sekang Purwokerto, karo isih akeh maning liyane.”

“Iya, yah. Jane dadi kuwajibane inyong kabeh sing kudune nguri–uri. Utamane para seniman dhalang sing ana nang wilayah Banyumas sekukuban. Kayong wingi durung suwe inyong tau maca nang Internet, nek tanggal 7 Nopember kuwe ditetepaken dadi Hari Wayang Dunia. Kuwe anu kepriwe, Ramane?” mas Gathot gole takon karo nyomot balokan.

“Hari Wayang Dunia kuwe didheklarasekaken taun 2016 nang ISI Surakarta, dhasare anane pengukuhan wayang minangka wa­risan utawa masterpiece Kebudayaan Donya sekang sidange UNESCO nang Paris Perancis, nalikane tanggal 7 Nopember 2003,” wangsulane Kaki Bawor.

“O. mulane tanggal 7 Nopember terus ditetepaken dadi Hari Wayang Dunia. Ya inyong mudheng saiki.” Mas Gathot gole nang­gapi karo menyat. “Inyong gole maring ngeneh jane mung arep ngemutaken, mengko wengi bar ngisa aja klalen, kumpulan RT nang omahe inyong. Gandheng wis sore, inyong pamit, Ramane.” Klilan.