Wajib Mbrastha Kemlaratan lan Njomplange Pengasilan
Diposting oleh : Administrator
Kategori: Pangudarasa - Dibaca: 191 kali

Yèn didelelng secara makro, negara kita sing jembar banget (mèh padha karo jembaré Éropa), pendhudhuké sing nggayuh ± 255 yuta, nyata negara gedhé sing subur makmur, sugih lan maju. Apamanèh yèn diban­dhing­aké karo jaman penjajahan; sing digambaraké wong Indonesia bisa urip mung kanthi sebénggol (2,5 sèn) sedina, (rega beras 6 sèn/kg); pancèn Indonesia saiki wis dadi nega­ra maju, akèh pendhudhuk wis klebu konglomerat, pertum­buhan ekonominé 5 %/taun.

Nanging ora kena kita lalèkaké, yèn angka kemiskinan uga dhuwur, 10,12 % saka total pendhudhuk utawa nggayuh 26, 58 yuta jiwa. Ateges saben wong 100, sing isih mlarat ana mèh wong 11. Cita-cita kita : masyarakat sing adil lan mak­mur, yèn makmuré wis saya nyedhaki kanyatan. Nanging adilé, isih adoh saka gegayuhan. Ketimpangan isih gedhé : jurang pemisah sing sugih lan sing mlarat isih amba. Dadi tugas kita kabèh- utamané punggawa pemerintahan- kanggo ngudi ilangé lan sabisa-bisané nyuda kemlaratan mau.

Jaman kepungkur, upaya mburu pertumbuhan ekonomi sok nginggiraké pendhudhuk miskin lan uga luwih njomplang­aké ketimpangan demi ekonomi sing tumbuh dhuwur. Ora ratané dhistribusi pametuné warga mung dianggep angin liwat. Ambisi pemerataan mung program kothong sing mèh ora ana asilé, kemelaratan kaya diumbar tanpa solusi. Saiki, pendhekatané dicoba diowahi. Pertumbuhan tetep dioyak, nanging ora dijoraké nggiles kaum miskin. Pemerataan ora mung jargon, nanging diwujudaké temenan jroning program kerja nyata. Usaha nyuda kemiskinan ora ditata ing sa­wijining program mligi, nanging didlesepaké minangka komponèn utama jroning sawernaning program pemerintah. Asilé wis katon nyata. Manut BPS, mudhuné angka kemis­kinan katon banget. Yèn September 2015, wong mlarat ana 28,51 yuta (11,13 %), September 2016 ana 27,76 yuta (10,7) %, September 2017 dadi 26,58 yuta (10,12) % saka total pendhudhuk. Ateges jroning rong taun (2015 – 2017) angka kemiskinan mudhun luwih saka 1 %.

Mesthi waé, ngono iku durung cukup, apamanèh peme­rintah Jokowi-JK wis nargètaké tingkat kemiskinan taun 2019 dadi ± 7 %— 8 %. Isih ana targèt 2 % luwih sing kudu diga­yuh jroning wektu kurang saka rong taun. Asil sing wis kagayuh dadi minangka alarm (tandha) supaya pemerintah luwih fokus manèh nggenjot program pengikisan kemiskinan. Mesthi waé kita ngajap asil penurunan angka kemiskinan bisa gedhé supaya bisa ngasilaké arti sing signifikan kanggo ngupayakaké masyarakat sing sejahtera.

Angka penurunan sing mung tipis, yèn dèn umbar malah bisa munculaké jebakan anyar, apa manèh yèn pemerintah nganti lirwa lan rumangsa wis marem. Malah Presiden Jo­kowi ing sidhang paripurna kabinèt kepungkur wis ngga­risaké, najan taun iki taun politik, kita tetep kudu fokus kerja utamané kanggo ngundhakaké pertumbuhan ekonomi, ngu­dhunaké angka kemiskinan lan ngurangi ketimpangan. Mula sakèh kementerian lan lembaga terkait, kudu ngendhalèni inflasi, ngatur dhistribusi program rastra (beras sejahtera) lan Bantuan Pangan Non Tunai (BPNT) wiwit awal taun iki.

Mligi kanggo dhaérah sing gumantung rega komoditas, kudu direalisasikan hilirasi komoditas tinamtu. Contoné, undhakan rega minyak kelapa sawit mentah (CPO) wiwit akhir 2016 njalari mudhuné angka kemiskinan, njurung per­tumbuhan ekonomi lan ngundhakaké pametunéwarga ing Kalimantan lan Sumatra. Kalimantan uga gumantung banget marang rega batu bara, sing mundhak saka 58,9 dollar AS/ton (2015) lan 65,7 dollar AS/ton (2016) dadi 86,5 dollar AS/ton (2017), wis kasil ngudhunaké angka kemiskinan ing Kalimantan.

Rèhné reregan komoditi mau bisa sawayah-wayah owah, kudu direalisasikan hilirisasi industri ing dhaérah penghasil komoditas ksb supaya njurung pengikisan kemiskinan warga ing kono. Iki salah sijiné usaha penting supaya kemiskinan warga suda lan ora gampang bali miskin manèh awit salah urus. (MW)

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan