Ayo Mlancong Ning Semarang: Kota Lama Kebak Nostalgia
Diposting oleh : Administrator
Kategori: Plesir - Dibaca: 233 kali

Yen Jakarta nduwe obyek wisata kutha kang aran “Kota Tua” Semarang uga nduweni obyek wisata kutha kang diarani “Kota Lama” kekarone nduweni daya tarik kang padha. Gedhung-gedhung kuna warisane penjajah luwih saka 200 taun kepungkur. Blegere isih pengkuh, ngadeg nggejejer.

Kawasan kota lama kang jembare 31 hektar ing jaman kolonial Walanda uga disebut Outstad. Kawasan kang dadi punjere perdagangan wektu iku mencar saka kawasan pemukiman pendhudhuk. Saingga kawasan iku uga sinebut “Little Netherland”. Ing kawa­san iki tinemu kurang luwih 50 bangu­nan kuna. Wiwit saka Kreteg Berok, Nilmij, Gereja Blendhuk, Netherlands Handel Maatschappij, Taman Sri Gun­-ting, Marba, Stasiun sepur Tawang, Marabunta (Gedhung Semut), De Spiegel nganti Gedhung Susteran Gedangan.

Emane ana sauntara gedhung-gedhung bersejarah iku kang mang­krak sajak ora kaurus. Pancen kari-kari iki instansi terkait wiwit bribik-bribik ngatur lan ndandani infrastruktur tu­muju menyang obyek wisata kutha kasebut.

 

Sejarah Kota Lama

Miturut sejarahe wiwit abad 18 kutha Semarang wis dadi pusat perdagangan. Utamaning gula, sabab wektu iku karana anane tanam paksa (Cultur Stelsel) Hindia Belanda mujudake penghasil gula nomer loro donya. Malah ing kawasan pecinan Semarang tinemu gedhong kang aran gedhong Gula kang jarene mbah-mbah biyen ing gedhong iku kanggo nyimpen gula sakdurunge diangkut menyang njaban rangkah. Sarana lewat transportasi banyu saka kawasan pecinan (Sebandaran) nganti tekan pelabuhan, ngliwati kreteg gantung (bisa diangkat) ing kawasan Kali Pelabuhan.

Kawasan kota lama kang dinggoni bangsawan lan juragan Walanda nganggep perlu dibangun benteng kanggo ngamanake wewengkon lan wargane saengga ing kawasan kase­but diedegake benteng kang dijeneng­ake benteng Vijhoek. Dalan inspeksi kang nggampangake ngontrol kawasan kasebut dijenengake Heeren Straat (saiki Jl. Letjen Suprapto). Salah sijine lawangan benteng kang isih meger-meger nganti saiki kang disebut De Zuiderpor utawa populer kanthi sebutan jembatan (kreteg) Berok.

 

Stasiun Sepur

Kutha Semarang nduweni stasiun sepur cacah loro, stasiun Poncol lan stasiun Tawang. Kekarone mujudake saksi bisu sejarah Hindia Belanda ing Semarang. Malah miturut buku Selayang Pandhang lan sejarah kutha Semarang kang diwetokake Pemkot, sinebut kutha Semarang mujudake tonggak sejarah perkeretaapian ing Indonesia. Stasiun Semarang Tawang mujudake gantine Stasiun Tambaksari kapisan duweke NIS (Netherland Indische Spoorwagen) kang diresmekake Gubernur Jendral Mr. Baron Sloet van de Beele ing tanggal 16 Juni 1864. Wiwit tanggal 10 Februari 1870 NIS wiwit nglayani jalur Semarang-Solo-Yogya.

Kantor besar NIS dumunung ing Lawangsewu kang wektu iki uga dadi obyek wisata kutha kang nduweni pros­pek cerah. Obyek wisata kutha liyane kang ngemu sejarah kang dadi ikone Semarang kang aran gereja Bledhuk. Gereja iki kawitane dibangun dening bangsa Portugis kanthi wewa­ngunan kang prasaja. Sakploke dikua­-sani pemerintah Hindia Belanda taun 1745 liwat arsiteke HPA de Wilde lan Westmaas kasil ngrampungake greja kasebut nganti nduweni bentuk kaya saiki.

Greja Protestan iki wiwit dianggo kebaktian taun 1753 kanthi pendheta Johanes Wihelmus Swemmelaar. Luwih rong abad bangunan geraja iki nggejejer lan dadi saksi bisu kepriye polah tingkahe pamarentah Hindia Belanda kiprah tanpa rumangsa salah. Kota lama pancen amung kebak nostalgia. (FX. Suyatno)

Berita Terkait

img

Samak Minggu Ini

img

img

Sumber Semangat

Saupamane wae kabagyan iku bisa dituku, mesthi wong-wong sugih bakal nuku kabagyan mau. Lan kita bakal kangelan oleh kabagyan ksb merga wis diborong wong kang sugih mau. Nanging tujune ka­bagyan kuwi anane mung ing njero  ati lan pikiran. Ka­bagyan iku mung bisa didu­weni dening wong kang pin­ter nindakake sukur.

Klik

ARIF WICAKSANA

Grengsenge mbabat alas kanggo kabutuhan pembangunan kanthi ngurbanake sakehing warna-warna ijo ing alam, pranyata isih ana uga kang gelem ngalah lan ngajeni banget marang ‘pabrik’ oksigen ksb. Iki salah siji contone, dimen nylametake wit siji-sijine, panggawene dalan nasional lila dienggokake. Dadi, ayo ndadekake wit-witan minangka karib kita, ing ngendi wae. (d/ist)***

Pethilan

Amandemen gumantung keputusan politik

Gumantung kepentingane uga

Koalisi padhadene ngenteni capres cawapres

Intip-intipan rupa lawas

Lobi-lobi politik saya kerep

Kasak kusuk, nyang-nyangan…