Nalika ‘Alhamdulillah’ Keprungu ing Arena UFC
Diposting oleh : Administrator
Kategori: Olahraga - Dibaca: 230 kali

Tukang gelut Rusia, Khabib Nurmagomedov, mbukak kalodhangan dhuel lawan Conor McGregor jroning ajang rebutan sabuk Ultimate Fighting Championship.

Kondisi iki kacipta sawise Nurmagomedov kasil nga­lahake Edson Barboza jroning dhuel ‘perbaikan’ peringkat kelas ringan ing UFC 219, Minggu 31 Desember 2017 kepungkur.

Nurmagomedov menang jroning etungan angka saka Arboza. Sarampunge gelut, Nurmagomedov ngandhakake komentare gegandhengan klawan kemenangane ing UFC 219 mau.

Priya kanthi julukan The Eagles iku ngandhakake yen kemenangane atas Barboza dadi spesial banget. Sebab, dina kuwi ngepasi karo dina laire anake.

“Alhamdulillah, aku pengin ngucap syukur marang Allah. Gusti kang maha agung, zat kang ora ana tandhingane. Aku muji syukur marang sakabehing kabagyan iki,” ujare Nurmagomedov.

Pancen, Nurmagomedov mujudake atlet kang ngrasuk agama Islam. Dheweke kuwi sawijining petarung muslim pisanan ing UFC. Lan, Nurmagomedov dikenal minangka muslim kang taat.

 

Kirim Tantangan kanggo McGregor

Kemenangan kasil dipethik Khabib Nurmagomedov nalika ngadhepi Edson Barboza jroning dhuel UFC 219. Jago gelut 29 taun iki kasil menang angka 30-25, 30-25, 30-24, Minggu mentas iki.

Kemenangan ing T- Mobile Arena Las Vegas, Amerika Serikat mau, ndadekake Nurmagomedov percaya diri. Mula ora nggumunake yen dheweke banjur nelakake tantangane marang Tony Ferguson lan Conor McGregor.

Satemene, Nurmagomedov du­rung mesthi langsung bisa ketemu McGregor. Bisa wae, dheweke kudu ngadhepi juara interim kelas ringan, Tony Ferguson. Nanging sajake kuwi ora masalah kanggone Nurmago­medov yen kudu dhuel lawan Fer­guson luwih dhisik.

“Tony, utawa Conor, ora masalah. Utawa bisa wae aku ngadhepi Ferguson lan Conor jroning sewengi. Kuwi yen UFC setuju. Aku istirahat sedhela kira-kira 30 menit, banjur sawise kuwi tarung karo Conor, mesthi wae sawise ngalahake Ferguson. Aku serius, ora guyonan iki,” ujare Nurma­go­medov kaya ditulis situs resmi UFC.

“Nanging mbokmenawa aku kudu andhap asor. Bengi iki, aku perlu ngalahake kekarone lan bali methik ajining dhiri. Sebab, kekarone kuwi akeh omong nalika aku nan­dhang lara,” imbuhe petarung asal Rusia ksb.

Rekor kemenangan Nurmagomedov ana 25-0 ing MMA lan 9-0 ing UFC. Dene Ferguson nduweni rekor 24-3 ing MMA lan 14-1 ing UFC. Rekor McGregor yakuwi 21-3 ing MMA lan 9-1 ing UFC.

“Miturutku Tony Ferguson duwe sabuk kang satemene. Conor, dheweke mung sepisan tarung ing UFC ing kelas ringan lan dheweke juara,” bacute Nurmagomedov.

“Conor kuwi petarung apik. Nanging, dheweke dudu juara. Dak kira akeh wong sing bisa ngalahake dheweke ing umur 155 taun…,” panutupe. (d)

Berita Terkait

img

Samak Minggu Ini

img

img

Sumber Semangat

Saupamane wae kabagyan iku bisa dituku, mesthi wong-wong sugih bakal nuku kabagyan mau. Lan kita bakal kangelan oleh kabagyan ksb merga wis diborong wong kang sugih mau. Nanging tujune ka­bagyan kuwi anane mung ing njero  ati lan pikiran. Ka­bagyan iku mung bisa didu­weni dening wong kang pin­ter nindakake sukur.

Klik

ARIF WICAKSANA

Grengsenge mbabat alas kanggo kabutuhan pembangunan kanthi ngurbanake sakehing warna-warna ijo ing alam, pranyata isih ana uga kang gelem ngalah lan ngajeni banget marang ‘pabrik’ oksigen ksb. Iki salah siji contone, dimen nylametake wit siji-sijine, panggawene dalan nasional lila dienggokake. Dadi, ayo ndadekake wit-witan minangka karib kita, ing ngendi wae. (d/ist)***

Pethilan

Amandemen gumantung keputusan politik

Gumantung kepentingane uga

Koalisi padhadene ngenteni capres cawapres

Intip-intipan rupa lawas

Lobi-lobi politik saya kerep

Kasak kusuk, nyang-nyangan…