Rehabilitasi, Pemidanaan lan LP ing pulo Mencil
Diposting oleh : Administrator
Kategori: Pangudarasa - Dibaca: 74 kali

Perang mungsuh narkoba sing minangka kadurjanan luwar biyasa pranyata isih adoh banget saka kemenangan. Rasané narkoba pancèn lunyu kaya welut putih lan kukuh kuwat kaya gunung Himalaya. Kabuktèn, lagi waé kasingkap narkoba jenis anyar pertengahan Desember wingi ing Diskotek MG Internasional Club ing Jakarta Barat. Narkoba iku wujud sabu ing kahanan cuwèr (cair). Nalika diskotek diglédhah, ketemu 80 botol sabu cair. Sabu sak botol sing didol regané

Rp 400.000,- iki bisa njalari mabuk (mendem) wong papat. Diskotek sing wis operasi rong taun lawasé iku dinuga kuwat ora mung minangka panggonan peredharan, nanging uga berprodhuksi. Ing kono uga ditemokaké atusan botol kothong liyané lan bubuk sing siap dicétak dadi pil prekursor ekstasi. Pabrik barang haram mau dinuga manggon ing lantai 2 lan 4. Nganti saiki aparat lagi netepaké karyawan diskotek 5 minangka tersangka. Déné pemilik lan pengendhali pabrik isih buron.

Kita sok mamèraké yèn negara kita gedhé banget, luwih saka 17.000 pulo lan pendhudhuké sing akèh banget, ana ±250 yuta. Nanging ya merga wilayahé sing jembar lan pendhudhuké sing akèh banget iku sing njalari penyelun­dhupan narkoba saka njaban rangkah lan perédharan antar pulo iki angèl banget dibrantas, nganti BNN kuwalahen. Kecekel ing kéné, sing kana njedhul, modhus siji ketangkep, modhus liyané njedhul. Mula pidana maksimal marang sakabèhing jaringan narkoba iku dadi mutlak dibutuhaké. Lan kasus iku sanyatané luwih melèkaké  (membukakan mata) yèn tugas abot liyané ora kalah urgen.

Wujud narkoba anyar ora mung masalah pinteré gémbong narkoba masaraké barang haram mau, nanging so’al adiksi parah sing namani bangsa Indonesia. Ya adiksi parah iki sing njalari narkoba duwé kedhok (topèng) lan modhus anyar. Bab mau uga wis diandharaké tilas Kepala BNN, Anang Is­kandar. Malah manut pak A. Iskandar, gedhé lan kuwaté pasar narkoba ing Indonesia uga dijalari penanganan sing kurang pas marang para penyalah guna narkoba. Sasuwéné iki pidana pancèn isih dadi penindakan tinimbang rehabilitasi. Nanging akibaté, para penyalah guna narkoba ora dadi waras, nanging tetep dadi pecandu sawisé metu saka pakunjaran.  

Isih dominané penindakan pidana uga bisa dideleng saka akèhé napi narkoba ing LP. Manut data pertengahan taun wingi, secara total kakèhan isiné LP nggayuh wong 73.350 utawa 169 % saka sakabèhing kapasitas LP. Saka gunggung napi ksb, wong 62.768 utawa ± 49,5 % minangka terpidana kasus narkoba.

Mligi kanggo wilayah Malang, Kapolres Malang Kota AKBP Asfuri ngandharaké yèn taun 2017 ana undhakan penanganan kasus narkoba saka 195 (2016) dadi 267 (2017), sing uga mratandhani peredharan narkoba cukup dhuwur ing Malang. Taun 2018 para bandharé uga kudu kena. Yèn nglawan kudu énggal dilumpuhaké. Tersangka terkait narkoba iki uga nyang­kut mahasiswa 35. Mrihatinaké banget. Angka-angka iku sejatiné asal muasalé petaka narkoba sing ora berujung ing negara kita. LP isih dadi suwargané bos narkoba. Ing njero LP isih ngayahi bisnis narkoba sekaligus ngaturperedharan narkoba ing njaban LP. Kamangka ing njero LP para pecandu uga olèh pasokan sing terjamin, tur wong-wong mau dijaga lan diwragadi negara.

Mula sabeneré langkah rehabilitasi kudu luwih diuta­mak­aké. Marang para prodhusèn lan bandhar. mutlak kudu divonis hukuman maksimal. Tugasé para hakim, ora kena rangu nibakaké vonis maksimal ksb. Kita uga njurung marang usulan nggawé pakunjaran ing pulo terpencil, supaya luwih gampang pengawasané lan ora ana hubungan karo masya­rakat.

BNN sing rasané kaya kuwalahan temenan ing perang mungsuh narkoba, kudu diperkuwat aja nganti kendho. Kanggo pencegahan, kurikulum sekolah kudu ditata manèh supaya efektif nyegah para murid lan mahasiswa berkenalan apa manèh nyoba dadi pengguna narkoba sing bakal mitunani tembé mburiné bangsa kita. (MW).

Berita Terkait

img

Samak Minggu Ini

img

img

Sumber Semangat

Urip iki cekak banget yen mung trima diisi karo rasa gela lan benci.

Klik

TRADHISI KAUL LAN ABDA’U ING MALUKU TENGAH

Iki sawijining tradhisi mbeleh wedhus ngarepake Idul Qurban. Ditindakake kaping pindho, yakuwi sing umum sawise shalat idul adha, lan ana maneh sing khusus. Sing khusus kanthi mbeleh wedhus 3. Sadurunge dibeleh, tetelune wedhus iki digendhong jarit dening tetuwane adat lan diarak keliling sinambi sholawatan nuju pelataran masjid Negeri Tulehu sawise Ashar. Tujuane ritual iki kanggo tolak balak lan nyenyuwun panga-yomane Gusti Allah kanggo masyarakat Tulehu. (d/ist)

Pethilan

Polri wiwit ngrasakake anane konflik pemilu

Digulung wae pak

Pasangan capres-cawapres setuju pemilu dhame

Pendhukunge sing dikon gontok-gon­tokan

Capres-cawapres nyiapake tim sukses

Sukarelawan, nanging ana pamrih