TILAS
Diposting oleh : Administrator
Kategori: Rena-rena - Dibaca: 13 kali

TILAS Ketua DPR Setya Novanto, wekasane kasil diadili ing sidang Tipikor. Mung emane dheweke “tapa mbisu” suthik mangsuli pitakone hakim-jaksa. * Suthik omong merga ora se­thithik anggone korupsi satak, Setya Novanto sajake njaluk disotho!

***

TILAS Ketum Golkar kuwi uga ethok-ethok lara maneh. Jare mencret-mencret nganti ping rolikur, mangka manut Jaksa Penuntut Umum, mung ping pindho. * Dhasar Se­tya Novanto asring kesangkut praktek korup, soal mencret wae meksa dimark up.

***

DHEK reuni alumni Aksi 212, Habib Rijiek sing saiki isih manggon ing Arab Saudi diangkat para pendukunge dadi Imam Besar Umat Indonesia. * Habib sing marahi habis pi-kir, Imam Besar kok umate hadoh ba­nget, apa Habib mung pawitan habab?

***

SAIKI sing nggenteni dadi Panglima TNI Marsekal Hadi Tjahjanto, mantan KSAU sing asale saka Malang. * Pengalamane  Hadi Tjahyanto ing kemiliteran pancen wis malang me­lin­tang, diajab aja nganti meleng cikben kariere saya meling-meling.

***

MAJELIS Ulama Indonesia kuciwa marang Mahkamah Konstitusi, dene nulak gawe nor­ma hukum kanggo ngukum sak abot-abote pelaku zina lan LGBT. * Sajake MK darbe keyakinan, LGBT kuwi bakale: (L)enjeh (G)endakan (B)untung (T)eme­n­­an.

***

PANGLIMA TNI Gatot Nurmantyo dicopot Presiden Jokowi durung wayahe, kabare merga seneng ngu­rusi politik. * Jendral Gatot pawakane gothot lan omongane getap, emane ku­rang gathekan, saiki mesthine mung kari getun karo getem-getem.

***

PRESIDEN AS Donald Trump diundhamana para pemimpin sejagad, amarga kumawani ngakoni ibukotane Israel iku dumunung ing Yeru­salem. * Patrape Trump sing srudag-srudug kaya trem, njalari donya ora ten­trem, jan trem.....belane temenan!

***

MERGA urusan Yerusalem, Mendikbud Muhadjir Effendi melu ditempuhake, awit ana buku IPS kanggo SD kelas VI nyebut: Yerusalem ibukota Israel. *  Nek ngono, bisa uga Presiden AS gawe pratelan sawise maca buku IPS murid SD Indonesia.

***

SAWISE diuji-materi pegawe PLN, pasal UU Ketenagakerjaan kang nglarangi pegawe ngrabi kanca sekantor, wekasane dibatalake MK. * Ngrabeni wong sekantor apa ku-wat? Ewa semono UU Ketenagakerjaan aja ngregoni wong nyalurake “tenaga kuda”.

***

TIM sukses Anies Baswedan jroning Pilgub DKI, kabare akeh sing dilebokake Tim Gubernur lan di­blanja Rp 20 juta sesasi saka APBD. * La-yak akeh penduduk Jakarta sing darbe penganggep APBD iku singkatan : (A)nies (P)entingke (B)alane (D)hewe.

***

NANGING wekasane Tim Gubernur DKI mau dicoret Mendagri Cahyo Kumolo. Kejaba gunggu-nge anggota nganti 74, anggaran ora kena nganggo APBD. * Sajake Pak Men­dagri uga ngarani, APBD kuwi cekakan saka: (A)nies (P)ancen (B)oros (D)hu­wite.

***

SAPLOKE ganti Ketum Erlangga Hartarto, Golkar wurung ndhukung Ridwan Kamil minangka Cagub Jabar, lan bali njagoni Dedi Mul­yadi Bupati Purwakarta. * Ridwan Kamil kari kowal-kawil, suwalike Dedi Mulyadi bakal mulya awit ora ngadi-adi.

***

WAKIL Ketua DPR Fadli Zon nganggep Ahok ora pantes entuk remisi Natal, awit minangka napi dheweke wis diistimewakake ing Rutan Brimob. * Pi-kiran becik iku khusnudzon, pikiran ala iku jenenge suudzon. Yen pikiran nyle­neh, jenenge Fadlizon.

***

ISYU sumebar, yen Khofifah Indarparawansa nyagub ing Jatim, jabatan Mensos bakal diwenehake menyang Idrus Marham tilas Sekjen Gol­kar. * Menawa kabar mau dadi kanya­tan, Idrus Marham kena diarani: nadyan kalah rupa nanging menang dupa.

***                                                

(GTS)

Berita Terkait

Samak Minggu Ini

img

img

Sumber Semangat

Yen kita ora bisa ngajeni, mula aja tau ngina.

Klik

KENYA MAIN TONG SETAN

Pemain tong setan biyasane wong lanang, nanging ing kene sing main sawijining wanita yakuwi kang jenenge Karmila Purba. Kenya umur 18 taun asal Pematang Siantar, Sumatra Utara iki cukup kondhang ora mung ing Indonesia, nanging uga ing donya. Iki gara-garane merga aksine diliput dening media asing yakuwi Guardian lan Metro. (d/ist)***

Pethilan

Presiden mundhut motor Royal Enfield Bullet 350 cc

Dadi kelingan esemka…

Tata kelola anggaran olahraga ala

Sabandhing lurus karo prestasine

Kabeh calon kepala daerah nyerahake LHKPN

Perkara datane bener apa ora uru­san mburi