Banjir Maning...! Banjir Maning...!
Diposting oleh : Administrator
Kategori: Banyumasan - Dibaca: 157 kali

Wengi kuwe, udan gebret, deres banget, Kaki Bawor ja­ketan rapet, isih nganggo mantel, sepatune jenggel plastik, kepeksa ngrubyug dalan sing lagi banjir, mangkat maring Gerdhu Pos Kamling nang pojok desa.

Temenan, nang Gerdhu wis kumpul wong papat, ana Mas Guru Tarno, Kebayan Dikin, Darman betor tukang becak motor, karo Yamun bujang tuwa durung payu rabi, sing gagehan nampani tremos karo tas kreseke, alok – “Lha si, kopine teka. Eh, karo ana balokane maning. Jan cocog kiye. Udan – udan, medang kopi nasgitel, lawuhe gorengan balokan sing egin panas kebul – kebul. Jan nylekamin temenan.”

“Wis telung dina udan bae wiwit esuk tekan esuk maning, jan ora ana terange.” Kaki Bawor mbukani rembug karo ma­pan njagong sila methengkes sendhean tabag pos kamling.

“Genah koh, Ramane. Desane inyong genah kebanjiren ma­ning kiye,” ujare Darman Betor sing pancen umahe asline nang desa Banjareja Kecamatan Nusawungu.

“ Desane rika kana pancen wis langganan banjir. Dadi wong – wonge wis ora kaget. Jarene banyu dhuwure wis semeter bae, ora ana sing gelem ngungsi. Sing melasi toli dulur – du­lure inyong padha, sing nang Karangtengah karo Sambirata Cilongok, sawahe mosak – masik ketrajang banjir bandhang, malah ana sing sawahe dadi kali, wis ora bisa ditanduri ma­ning.” Mas guru Tarno ngomong karo ndamoni gelas kopine.

“Iya, apa maning dhaerah langganan banjir, ana udan gedhe telung dina kaya kiye, wis genah banjire teka. Se­prandene, wonge kayong padha ayem bae. “- Kebayan Dikin gole ngomong, tangane karo nyomot balokan budin digoreng. “Paling mung padha ngomong ngresula karo nggrundel, banjir maning, banjir maning… Lha, bareng kota Cilacap sing biasane ora tau banjir, winginane klakon geger, mergane keduman banjir. Kepriwe jal Ramane ? Nangapa kota Cilacap banjir ?”- rampung ngomong terus ngemplok balokan, telep.

Kaki Bawor ngunjal ambegan dhisit gole arep mangsuli,- “ Inyong dhewek ya ora ngerti, wong inyong dudu ahline mikir­aken banjir. Ningen sing genah, dhong jaman ganu egin akeh sawahe, Cilacap ora tau banjir. Lha, bareng sikine sawahe wis meh entong, didegi bangunan gedhong. Sasate wis ora ana lemah kosong, sing bisa ngresepaken banyu.”-

-” Genahe lahan peresapane wis langka, mulane bareng udane ngedhur, apa maning segarene ya lagi rob, dadi ma­rakaken banjir. “- sambunge mas guru Tarno.

“ Iya, kaya kuwe karepe inyong. Kayonge kiye wis mandan terang, nganah padha mider karo njikoti jimpitan. Inyong tek tunggu Gerdu.”-

“Siap, ndhan.” Kebayan Dikin gole mangsuli karo kormat kaya prajurit. –”Klilan…”

Berita Terkait

img

Samak Minggu Ini

img

img

Sumber Semangat

Urip iki cekak banget yen mung trima diisi karo rasa gela lan benci.

Klik

TRADHISI KAUL LAN ABDA’U ING MALUKU TENGAH

Iki sawijining tradhisi mbeleh wedhus ngarepake Idul Qurban. Ditindakake kaping pindho, yakuwi sing umum sawise shalat idul adha, lan ana maneh sing khusus. Sing khusus kanthi mbeleh wedhus 3. Sadurunge dibeleh, tetelune wedhus iki digendhong jarit dening tetuwane adat lan diarak keliling sinambi sholawatan nuju pelataran masjid Negeri Tulehu sawise Ashar. Tujuane ritual iki kanggo tolak balak lan nyenyuwun panga-yomane Gusti Allah kanggo masyarakat Tulehu. (d/ist)

Pethilan

Polri wiwit ngrasakake anane konflik pemilu

Digulung wae pak

Pasangan capres-cawapres setuju pemilu dhame

Pendhukunge sing dikon gontok-gon­tokan

Capres-cawapres nyiapake tim sukses

Sukarelawan, nanging ana pamrih