Pulisi Gerebeg Pabrik Narkoba
Diposting oleh : Administrator
Kategori: Dredah Masalah - Dibaca: 77 kali

Bareskrim Mabes Polri miyak pabrik narkoba ing Aparte-men Green Lake Sunter Northern Park, Jakarta Utara. Pehake kasil nemokake barang bukti sabu kehe 7 kg, sarta netepake tersangka papat ing perkara iki.

Sawise Badan Narkotika Nasional (BNN) miyak pabrik narkoba cair ing diskotek MG Club International pungkasan minggu kepungkur, saiki giliran Bareskrim Polri nggerebeg pabrik narkoba ing Apartemen Green Lake Sunter Northern Park, Jakarta Utara.

Direktur Tindak Pidana Narkoba Bareskrim Polri Brigjen Pol Eko Dani­yanto mratelakake, pabrik narkoba iku kawiyak sakawit saka wadulane warga. Senin (18/12), pulisi nggerebeg iku sawise nindakake penyelidhikan suwene sesasi.

“Kanthi urut tersangkane ditangkep wiwit tanggal 18/12 kepungkur. Wiwitan tersangka Angel, banjur pacare Cacing, lan ana tersangka Bule lan HLR,” kan­dhane Eko ing ruwang keamanan Apartemen Green Lake Northern, Sunter, Rebo (20/12).

Manut kandhane, pulisi nemokake sabu ing loteng 16 apartemen kehe 7 kilogram. Kejaba iku, pulisi uga nemokake piranti home indutry ekstasi kapsul, happy five 6.000 iji, ketamine 976 gram, lan bungkus kapsul kosong papat. Ana uga cithakan kapsul ekstasi patang iji, bubuk ekstasi 760 gram, pipet, timbangan digital, lan lem tembak.

Cara sing digunakake para durjana yaiku nglebokake kapsul-kapsul narko-tika menyang njerone kothak inuman kemasan.

“Dadi dheweke ngracik eksatasine slaras karo pesenan. Banjur dilebokake menyang njero kapsul. Mengko diseleh njero kothak inuman kemasan, kaya-dene Teh Kotak, banjur dilem. Banjur kongkonan uwong nyeleh pesenan kasebut ing sawijining panggonan supaya mengko dijupuk kongkonan liyane. Iki sing diarani sel terputus,” jlentrehe petugas.

“Panangkepe para durjana iki wis mathuk karo prentahe Kapolri Jenderal Tito Karnavian supay tansah ngaman-ake kahanan utamane ngadhepi Natal lan Tahun Baru. Iki mujudake kasile Tim Satgas 1 Bareskrim Polri. Iki minangka tumindak kang ora nate ana rampunge kanggo njejegake hukum utamane tumrap narkotika,” ujare Brigjen Muhammad Iqbal, Kepala Biro Penerangan Divisi Humas Polri.

 

Peringatan

Kepala Dinas Pariwisata dan Kebudayaan DKI Jakarta Ujang Supandi ngandhakake, nembe diskotek papat ing Jakarta sing wis diwenehi ‘peri-ngatan keras’. Peringatan iku diweneh-ake jalaran ditemokake anane ideran narkoba ing diskotek kasebut.

“Sing wis diwenehi peringatan mau yaiku Illigals, B’Fashion, Classic, lan Golden Crown,” kandhane Ujang.

Yen ing diskotek-diskotek kasebut ditemokake maneh anane ideran narkobo, Pemerintah Provinsi DKI Jakarta ora wigah-wigih bakal nutup papan-papan panglipur kasebut. Saiki kapapate diskotek kasebut nembe diwenehi peringatan keras sepisan.

“Bener, tinemokake narkoba. Nembe peringatan, peringatan keras sepisan-an,” tambahe Ujang.

Sadurunge, Wakil Gubernur DKI Ja-karta Sandiaga Uno nemokake sakehing tempat hiburan malam (THM) ing Ja-karta kang disujanani dadi papan sumebare narkoba lan wis antuk peringatan keras. Sandi ngajap marang sakehing THM iki enggal tata-tata sadurunge mengko diterbitake surat teguran engga pencabutan idin usaha.

Kepala Bidang Pemberantasan Ba-dan Narkotika Nasional Provinsi (BNNP) DKI Jakarta Maria Sorlury ngandhakake, BNNP DKI pancen nemokake tandha-tandha anane idere narkoba ing sape-rangan diskotek utawa tempat hiburan malam (THM) liyane. Anane panduga midere narkoba iku disumurupi saka asil tes uyuhe para pengunjung.

Sawatara iku ing Palembang (Sumsel) ana pulisi loro sing dipecat. Sing siji yaiku Aipda Mardiansyah dipecat klawan ora kinormat merga kadenangan nduweni sabu-sabu kehe 1 kilogram. Dene Brigda Helwani dipecat merga ninggalake tugas (desersi).

Lelorone petugas nakal iki dicopot sragame dening Kapolda Sumsel Irjen Pol Zulkarnain Adinegera ing upacara ‘pemberhentian tidak dengan hormat’ (PTDH) ing plataran Mapolda Sumsel, Rebo (20/12) kepungkur. Sragame saklorom diganti nganggo klabi bathik lengen dawa.

Aipda Mardiansyah wis antuk putusan hukum tetap arupa ponis ukuman kunjara 10 taun wiwit 4 April 2017. Ponis marang tilas Katim Narkoba Satresnarkoba Polresta Palembang iku luwih entheng saka tuntutan jaksa penuntut umum (JPU), yaiku kunjara 14 taun merga nduweni sabu-sabu 1 kilogram.

Dene Brigda Helwani sing dinese ing Subbag Renmin Satbrimob Polda Sumsel ninggalake tugas klawan ora sah (desersi) ing wektu luwih saka 30 dina kanthi terus-terusan, trepe rong taun. “Ora mung iku wae, Helwani iki uga menganggo narkoba,” pratelane Kapolda nalika mimpin upacara PTDH.

Mripate Mardiansyah lan Helwani katon abang lan mbrebes mili. Nalika ditakoni Kapolda, lelorone kandha getun. “Siap, Pak. Saya menyesal melakukan ini,” ujare Mardiansyah.

Kapolda mratelakake, dheweke ora malah seneng nindakake PTDH iki. Nanging, minangka pimpinan, dheweke kudu tegas. “Polisi nakal kaya ngene iki dadi tuladha ala. Luwih becik pancen kudu dibuwang. Nanging, tamtu ora sakarepe dhewe,” ujare. Kapolda ngajap PTDH marang anggota loro iku dadia pelajaran mungguhing anggota liyane. “Jadilah polisi yang benar-benar rahmatan lilalamin,” welinge.

Jenderal bintang loro iki nandhesake maneh ora bakal aweh pangapura marang anggotane sing nakal lan ora tuhu marang peraturan. Apamaneh sing kesangkud narkoba. Sasuwene taun 2017, Polda Sumsel wis mecat anggotane kehe walu klawan maneka kaluputan. “Dheweke kabeh nyoreng jenenge Polri. Sacara administrasi, dheweke wis ora maneh dadi anggota Polri,” tandhese.

Alumni Akpol 1985 iku nambahake, saiki iki uga lagi diproses sawijining oknum pulisi sing kesangkud perkara perampogan ing omahe Rita Yustini, warga Lr Cempaka, Kelurahan 5 Ulu, Kecamatan SUI. Oknum kasebut yaiku Briptu AT, anggota Polres Empat Lawang. “Enggal dijokake kanggo PTDH.Pulisi kok ngrampog,” ujare. (Tim)

Berita Terkait

Samak Minggu Ini

img

img

Sumber Semangat

Aja nganggep awakmu tansah salah, uga aja nganggep awakmu tansah bener.

Klik

KAYA JELI

Iki dudu plastik utawa ager-ager jeli, nanging iki bangsane iwak. Jelase iki Plankton kang wujude bening. Jeneng latine yakuwi Salp (Salpingo-oophorectomy) mujudake kewan kang nduweni kaunikan kanthi kulit transparan. Saking transparane, akeh wong ngira yen plankton iki plastik bening kang ngambang ing laut. (d/ist)***

Pethilan

Saperangan gedhe kabutuhan bawang putih diimpor

Petani wis biasa nangis bawang Bombay kok!

Sertifikasi tanah kuwi program nyata, dhawuhe Presiden

Dadi sing apus-apus sapa iki?

Wakil rakyat saya adoh saka rakyat

Saya adoh, menyang segara wae!