KPK Kudu Trajang, Wni, Jujur lan Bener
Diposting oleh : Administrator
Kategori: Pangudarasa - Dibaca: 186 kali

Akhir taun 2017, disambung awal taun 2018 kahanan jagad umyeg karo kegiyatané dhéwé-dhéwé. Masalah politik donya utamané digègèraké karo anané putusan sepihak pre­si­den AS Donald Trump kang nékad ngakoni Yerusalem mi­nangka ibu kotané Israel. Kaya ing jagad pakeliran (wayang) kena diarani : Bumi gonjang-ganjing langit kelap-kelap katon lir lintangé ngalih... merga Amerika Serikat iku negara Adi daya, wani tumindak adigang adigung adi guna, sakarepé dhé­wé. Jagad internasional guncang, udan protes lsp, se­najan umumé ya mung ing diplomatik lan suwara-suwara thok. Awit, sapa sing wani perang mungsuh AS, negara adi daya iki. Toh ing Dewan Keamanan PBB rancangan naskah mungsuh AS sing diajokaké déning Mesir ya mentah kena Veto déning AS.

Kahanan jroning negara, taun politik saya gawé panasé swasana, ngadhepi Pilkada serentak, ngarepaké Pemilu le­gis­latif lan Pilpres, isih ditambah grengsengé ngadhepi Asian Games taun ngarep ing Jakarta lan Palembang, mbrastha Korupsi lan narkoba sing minangka kadurjanan luwar biyasa, nganti negara kita disebut déning presiden Jokowi ing ka­hanan darurat narkoba.

Ing pembrantasan korupsi, sing paling narik kawigatèn yaiku wiwit kasilé KPK ngadili gémbong méga korupsi E-KTP, Setya Novanto (SN)sing kasusra minangka politikus ka­wakan lan lihai. SN, tilas Ketum Golkar lan tilas Ketua DPR wis kasil dilungguhaké minangka terdakwa ing Pengadilan Tipikor Jakarta. Bab iku nyata dudu gawéyan sepélé lan gam­pang kanggoné KPK bisané kasil, nganti ngerigaké sakabèhing daya lan tenaga ngadhepi SN sing uga wis nggunakaké ma­néka taktik lan strategi hukum, nanging kasil dimentahaké déning KPK.

Nalika KPK sepisanan netepaké SN minangka tersangka korupsi, sidhang pra peradilan kasil mentahaké. Nalika KPK tu­mindak sing kaping pindhoné, SN uga nglawan nganggo manéka cara, kanthi pawadan lara lan ngilang nalika arep ditahan, njalari kasus iki kaya déné drama panjang sing njèng­kèlaké. Nganti drama mau pindha dhagelan, kaya ta éthok-éthok lara diare parah lan mbisu nalika ditakoni iden­titasé déning hakim. Nanging team dokter nyatakaké yèn SN séhat lan bisa disidhang. SN gagal ngulur napas.

Amarga materi dakwaan wis diwacakaké ing pengadilan, permohonan pra peradilan déning SN wis dinyatakakaké gu­gur demi hukum. Saiki nasibé SN gumantung marang Peng­adilan Tipikor. Lan kita ngapresiasi KPK sing pantang mundur nggawa SN menyang meja ijo; lan yèn SN nyata salah, bui wis siyaga nampa. Babak sepisanan wis diliwati KPK. Nanging babak-babak saterusé wis nunggu KPK. Saterusé KPK kudu bisa mbuktèkaké yèn SN pancèn luput. KPK uga kudu bisa mbuktèkaké yèn mung sak bagiyan saka kasus korupsi gedhé sing barjama’ah ramé-ramé. Ing dakwaan marang SN ana pihak 27, wiwit eksekutif, legislatif lan swasta sing ngedum-dum dhuwit garongan saka proyek E-KTP sing gedhéné Rp 5,9 T lan mitunani negara Rp 2,3 T.

Kita sing dudu ahli hukum waé ngerti yèn uwong sing ora dosa, ora usah mubang-mubeng golèk alasan werna-wer­na lan kanthi cara éthok-éthok lara lsp. Yèn wong pancèn bener, tetep waé angler. Sing salah mesthi sèlèh, sing goroh growah, sing umuk bakal ketekuk. SN mesthiné dudu akhir dra­ma njelèhi iki. KPK isih kudu kerja keras njiret para durja­na­né. Kita ngacungi jempol karyané KPK sing kasil njiret SN. Nanging KPK banjur bakal dadi dholim lan ora adil yèn banjur ngumbar para pelaku liyané bébas melenggang kang­kung kaya kasuss-kasus sadurungé. KPK ora kena tebang pilih. Wis cetha yèn penyebutan ing dakwaan iku ora mung asil kira-kira utawa ngarang, nanging mesthiadhedhasar sakora-orané bukti awal loro sing wis kecekel tangan. Kita uga isih ora lali karo kasus-kasus sing durung rampung kaya Wisma Hambalang, Bank Century.

Ayo KPK ! Kerja terus. Brastha korupsi saka bumi Nuswan­tara. Yèn KPK jujur, wani lan trajang, nyata KPK hébat lan bener bisa dipercaya lan diandelaké déning rakyat. (MW)

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan