Tandha Panuwun
Diposting oleh : Administrator
Kategori: Banyumasan - Dibaca: 182 kali

“Ramane,... ramane...., ramane...., giye ngeneh gageyan Ramane,” mbe­kayu Tebok melung-melung sekang latar umah ngundang ramane ya Kaki Bawor sing kebeneran lagi nang pekarangan. Ramane ya kaki Bawor sing lagi ndhangir wit bolet nang mburi ngumah mandan kaget krungu anake melung-melung ngundang.

“Ana apa sih Tebok, balik sekang bale desa koh terus melung-melung nang latar ngundang ramane, ana apa sih. Kayonge koh kesusu temen,” ujare aki Bawor karo egin nggawa pancong utawa pacul cilik sing tes nggo ndhangiri tanduran nang pekarangan, karo ngelapi kringete sing dleweran.

“Ramane, rika ngerti utawa wawuh apa ora karo kaki Sandi, juru tulis nang kantor camat sing dilaporaken maring pak camat sing jere monge, kewenangan jalaran nampa panuwun sekang wong sing digawekaken surat keterangan,” ujare mbekayu Tebok karo nuntun ramane mlebu maring bale umahe.

“Lha njuran keprimen gandhengane karo ko melung-melung ngundang inyong sing lagi ndhangir boled nang mburitan,” takone kaki Bawor kepengin ngerti.

“Giyeh Ramane, oknum kaya juru tulis Sandi, nek nganti kewenangan nang pak camat utawa nang mantri polisi pagar praja (Pol PP) jere monge garep diskors apa pangkate ora mundhak. Malahan nek kewenangan ngenggon, utawa tertangkap tangan kaya ketangkep nang Komisi Pen­cegahan Korupsi (KPK) teyeng dipecat dadi Pegawe Negri Sipil (PNS),” ujare mbekayu Tebok karo ndhudhah berkat sing tembe digawa sekang bale desa. Isine ciwel, mendhoan, gethuk karo kacang godhog.

Lha kuwe perkarane keprimen, koh nganti juru tulis Sandi sing sokan mbantu warga ngurus surat-surat koh nganti dipaido dening pak camat utawa dilaporaken maring pak camat,” kaki Bawor kepengin ngerti.

“Ramane, jere monge juru tulis Sandi nampa panuwun sekang warga sing nggawekaken layang, gedhene ora sepira, ningen ana kanca batir pegawe kecamatan sing weruh juru tulis Sandi nampa tandha panuwun njuran dilaporaken maring pak camat. Lha crita kuwe uplek diwartakaken dening kanca batir pamong nang bale desa,” ujare Tebok karo sriwutan nggawekaken teh nggo ramane. Apamaning wis ana pacitan sing digawa mbekayu Tebok sekang bale desa.

“Ooo kaya kuwe ya Tebok. Pancen, sing jenenge nampa tandha panuwun kaya kuwe sekiye nang pemerintahane presiden Joko Widodo wis ora olih, dilarang. Jalaran PNS lan aparat pemerintah liyane kuwe wis nampa gaji lan tunjangan. Dadi pancen pegaweane nggawekaken surat-surat lan nglayani keperluane masyarakat liyane. Tebok, ko kemutan apa ora, ana penggedhe sing olih tandha terima kasih sekang pengusaha, ketangkep tangan dening KPK, sekiye penggedhe mau dikurung dening KPK. Malahan, jabatane dilorod. Uga ana hakim sing nampa tandha panuwun sing uga njuran dipecat dadi hakim. Ko mesthine egin kemutan, jalaran kedadeyane durung suwe,” kaki Bawor crita ngethuprus.

“Tandha penuwun kuwe apa padha karo sogokan sih ramane?” mbekayu Tebok takon.

“Tandha panuwun kuwe ya padha karo sogokan, men perkarane gelis tuntas. Utawa PNS nggawe layang men cepet dadi. Kuwe padha karo korupsi. Mulane pemerintah njuran ngedegaken lembaga sing dijenengi Satuan Kerja Pemberantasan Korupsi disingkat Saberpungli. Jalaran sing jenenge ucapan panuwun utawa terima kasih kuwe nyebar mratak nang ngendi panggonan pelayanan umum, kelebu nang pengadilan,” ujare kaki Bawor. KLILAN

 

Berita Terkait

img

Samak Minggu Ini

img

img

Sumber Semangat

Urip iki cekak banget yen mung trima diisi karo rasa gela lan benci.

Klik

TRADHISI KAUL LAN ABDA’U ING MALUKU TENGAH

Iki sawijining tradhisi mbeleh wedhus ngarepake Idul Qurban. Ditindakake kaping pindho, yakuwi sing umum sawise shalat idul adha, lan ana maneh sing khusus. Sing khusus kanthi mbeleh wedhus 3. Sadurunge dibeleh, tetelune wedhus iki digendhong jarit dening tetuwane adat lan diarak keliling sinambi sholawatan nuju pelataran masjid Negeri Tulehu sawise Ashar. Tujuane ritual iki kanggo tolak balak lan nyenyuwun panga-yomane Gusti Allah kanggo masyarakat Tulehu. (d/ist)

Pethilan

Polri wiwit ngrasakake anane konflik pemilu

Digulung wae pak

Pasangan capres-cawapres setuju pemilu dhame

Pendhukunge sing dikon gontok-gon­tokan

Capres-cawapres nyiapake tim sukses

Sukarelawan, nanging ana pamrih