Jula Juli
Diposting oleh : Administrator
Kategori: Rena-rena - Dibaca: 4 kali

PEGIAT anti korupsi nyubriyani, DPR-Polri mupakatan ndhapuk Densus Anti Korupsi jan-jane mung kanggo ngringkihake KPK. * Ko­rupsi dipusus klawan khusus liwat  Den­sus, malah ngetokake yen DPR ora ka­wus-kawus tumindak sing ora urus!

***

WAKIL Ketua DPR Fahri Hamzah ngarani, Wapres JK sing nampik Densus Anti Korupsi nelakake yen Wapres nganggo meneje­men pasar klonthong. * Eling-eling po­litisi panji klanthung (tanpa partai), Fahri Hamzah  fikirane fancen  farah.                                                                           

***

WEWATON Survei Sosial Ekonomi Nasional, yen dietung-etung utang Indonesia bisa lunas menawa saben rakyat urunan Rp 15,4 juta. * Negara nganggo dhuwit pa­nas, kapan bisane lunas, wong ekonomi rakyat sedinane akeh sing lanas.

***

ANIES Baswedan Gubernur DKI Jakarta sing anyar, pidato pelantikane diundhamana publik merga nggepok prakara pribumi. * Anies Baswedan anis (ilang) ing kawaspadan. Sampeyan pribadi jan-jane ya non pri­bumi, pripun niki?                                                                          

***

WAGUB DKI Sandiaga Uno entuk diskresi, ngantor menyang Balaikota tetep ngang­go sepatu kets, cikben bisa sinambi playon. * Sandiaga gawe rakyat Jakarta dadi sandeya, awit sing dibutuhake pe­mimpin kerjane maton, dudu pelari ma­raton.

***

KETUM Demokrat SBY mbiji, telung taun pemerintahan Jokowi-JK wis akeh sing ditindaka­ke, krana kuwi kita kabeh kudu nyeng­kuyung. * Iku sing paling mathuk. Awit ana sing tata laire manthuk-manthuk, nanging seka mburi pijer ngguthuk.

***

AKEH Ketum Parpol sing kandha, kena wae Prabowo maju maneh ing Pilpres 2019, nanging elinga yen elektabilitase saya mlorot. * Dupeh durung kempot, senajan elekta­bilitas mlorot tetep ngotot alkhotot, ora perduli mengkone mung kari kerot.

***

MANUT Menkeu Sri Mulyani, anggaran infrastruktur nganti Rp 409 trilyun, awit kanggo nguyak pembangunan sing ketinggalan. * Sri Mulyani pengin mulyane rakyat, ang­garan dipantha-pantha amrih pem­bangunan ora keponthal-ponthal.

***

NGUGEMI janjine marang warga kota Surabaya, Walikota Tri Risma Harini tetep puguh ora kepengin melu Pilgub Jatim 2018. * Tin­dake Bu Walkot sing wangkot, pepe­nginane Gus Ipul dadi Jatim-1 Insya Allah bakal makbul, ora sida njegadhul. 

***

JARENE Usman Hamid Direktur Amnesty International Indonesia, 3 taun pemerintahan Jokowi-JK masalah HAM jalan di tempat. * Amid-amid, mongsok Usman Hamid ora pa­ham, HAM iku jan-jane: (H)urusane (A)mung (M)uter.

***

KETUM Partai Gerindra Prabowo Subianto rumangsa sedhih, saiki yen pengin dadi Kepala Daerah malah ditakoni: duwe dhuwit pira? * Jamane sangsaya tuwa, sing ora doyan dhuwit mung wawa. Tanpa dhu­wit kelangan prebawa, sedina-dina sungkawa.

***

SENAJAN wekasane diidinake, Panglima TNI Gatot Nurmantyo kaget rikala arep tindak Washington kena cekal pemerintah AS. * RI dudu negara abal-abal, nyekal petinggi negara teka sakkal. Patrape AS pancen mokal-mokal, sapa iki sing darbe pokal?

***

PLN Blitar rugi Rp 500 juta sesasi, amarga kabel keganggu bocah dolanan layangan, emane Pem­da ora gelem melu cawe-cawe. * Nga­dhepi Pemda Blitar kudu blater. Yen ora, suwe-suwe PLN dadi: (P)erusahaan (L)is­trik (N)genes.

                         ***                    (GTS)

Berita Terkait

Samak Minggu Ini

img

img

Sumber Semangat

Wong kang akeh ngucapake kabecikan iku “luwih becik” katimbang wong kang seneng mbisu.

Klik

BALAPAN WEDHUS

Sawijining bocah cilik lagi melu tandhing ing sawijining lomba balapan nunggang wedhus utawa mutton busting. Acara kaya ngene iki cukup populer jroning pawai Fourth of July parade ing kutha Vale, Oregon, AS. (d/ist)***

Pethilan

Mendikbud ngajab, bayare guru honorer ndang diwenehke

Iki sing jenenge menteri zaman now!

Mendikbud ngajab, bayare guru honorer ndang diwenehke

Iki sing jenenge menteri zaman now!

Panglima TNI ditulak mlebu AS

Mengko gek merga, titttt…. (sensor!)