Nyegerake Badan lan Pikiran Klawan Ngunjuk Banyu Klapa Campur Timun
Diposting oleh : Administrator
Kategori: Kasarasan - Dibaca: 84 kali

Duwe kegiyan akeh ing saben dinane kerep gawe badan krasa gampang kesel. Ora mung iku wae, pikiran rasane uga krasa judheg, kurang nyaman lan ndadekake mumet. Apamaneh, nalika ngelingi marang anane sakehing pegaweyan sing kudu enggal dirampungake apa iku tugas

ing omah apadene tugas pendhidhikan.

Yen wis mangkene, wigati mungguhing kita kanggo bali nyegerake pikiran. Kita bisa miwiti klawan refreshing ing papan sing nyenengake, konsumsi sakehing panganan sehat utawa saderma minum inuman sing nyegerake dalasan nentremake ati. Salah siji inuman sing bisa nentremake ati ing antarane yaiku banyu klapa lan timun.

Nutrisi kang kinandhut ing njerone banyu klapa bisa gawe perasaan lon-lonan dadi luwih tenang lan seneng. Sawatara segere woh timun, iki ndadekake swasanane ati dadi luwih becik. Iki uga bisa ndadekake kahanane badan saya seger lan sehat.

Dene cara nggawene banyu klapa lan timun sing nyegerake pikiran mau gampang banget. Carane:

Bahan sing kudu disiyapake yaiku timun siji, woh lemon siji, banyu klapa (saka klapa enom loro) sagelas, lan madu sacukupe.

Carane nggawe; woh lemon lan timun diiris tipis-tipis. Iling banyu klapa menyang gelas banjur ditambahi irisan lemon lan timun. Tambahake madu supaya rasane tambah legi lan wangi. Yen kita seneng ngunjuk adhem, diwenehi es batu. Ajeg ngunjuk inuman iki saora-orane seminggu kaping pindho ndadekake pikiran luwih fresh lan seneng. Ora mung iku wae, nanging inuman iki uga bisa mbiyantu badan dadi seger sehat. Jalaran inuman iki bisa ningkatake daya tahane badan saengga uwal saka sakehing resiko penyakit.

 

Supaya ora kembung

Sawatara iku, ana pawongan yen ngunjuk kopi wetenge dadi kembung lan muneg. Mungguh kita sing kerep ngalami bab kasebut ing ngisor iki ana cara sing prasaja sing bisa dicoba supaya bubar nginum kopi weteng kita ora kembung.

Carane: Sadurunge ngunjuk kopi kita wajib sarapan utawa mangan sethithik. Utawa yen ora kulina sarapan becike nginum banyu putih dhisik sadurunge ngunjuk kopi.

Gawe kopi kudu nganggo banyu umob. Aja migunakake banyu termos utawa dispenser. Sawise banyu mateng, enteni sedhela watara 30 dhetik lan teko dibukak supaya uwabe banyu metu sadurunge disokake menyang kopi.

Udhek sing rata lan sawise iku cingkir utawa gelas ditutup. Ditogake sedhela lan nembe dinikmati sawise kopi anget.

Cara iki bakal mbiyantu nyuda kembung nalika nginum kopi ireng. Mangga dicoba, muga-muga cocog. Nuwun (B/int)

 

Berita Terkait

img

Samak Minggu Ini

img

img

Sumber Semangat

Saupamane wae kabagyan iku bisa dituku, mesthi wong-wong sugih bakal nuku kabagyan mau. Lan kita bakal kangelan oleh kabagyan ksb merga wis diborong wong kang sugih mau. Nanging tujune ka­bagyan kuwi anane mung ing njero  ati lan pikiran. Ka­bagyan iku mung bisa didu­weni dening wong kang pin­ter nindakake sukur.

Klik

ARIF WICAKSANA

Grengsenge mbabat alas kanggo kabutuhan pembangunan kanthi ngurbanake sakehing warna-warna ijo ing alam, pranyata isih ana uga kang gelem ngalah lan ngajeni banget marang ‘pabrik’ oksigen ksb. Iki salah siji contone, dimen nylametake wit siji-sijine, panggawene dalan nasional lila dienggokake. Dadi, ayo ndadekake wit-witan minangka karib kita, ing ngendi wae. (d/ist)***

Pethilan

Amandemen gumantung keputusan politik

Gumantung kepentingane uga

Koalisi padhadene ngenteni capres cawapres

Intip-intipan rupa lawas

Lobi-lobi politik saya kerep

Kasak kusuk, nyang-nyangan…