Senggani, Jurang kang Merak Ati
Diposting oleh : Administrator
Kategori: Plesir - Dibaca: 28 kali

Jenenge Senggani, wujude jurang, nanging dudu jurang kang medeni, malah iki jurang kang merak ati. Mula Jurang Senggani banjur kerep dadi jujugan sapa wae kang pengin ngenggar-enggar ati. Papane asri, idhum lan edi peni.

 

Jurang Senggani dununge ing Tulungagung, persise ing  desa Nglurup kecamatan Sendang lan klebu destinasi wisata anyar ing kutha marmer iki, merga pancen lagi dibukak kanggo umum sasi Januari kepungkur. Senajan klebu papan wisata anyar, nanging jurang kang ana ing perenge gunung Wilis iki wis ditata edi peni kanthi fasilitas kang cukup pepak. Malah ing kene uga ana pekarangane kanggo kemah, saengga wisatawan bisa ngrasakake sensasi nginep ing tengah alas pinus kang hawane anyes.

Sukaji, anggota Pokdarwis Jurang Senggani Sidorejo ngandhakake marang Panjebar Semangat, obyek wisata Jurang Senggani uga wis dipepaki sarana pendukung kaya upamane gardhu pandang, bandhulan, rumah pohon,  flying fox, maneka warna payung cinta, jogging track, toilet lan sapanunggalane. 

“Mung kanthi mbayar limang ewu, pengunjung wis bisa ngrasakake sensasi nylorot saka papan kang dhuwure 7 meter nggandhul ing tali kang dawane 100 meter” ujare pak Sukaji.

Ditambahake dening Sukaji, prasarana liyane kang lagi digarap yakuwi café container, jembatan gantung, MCK portable lan sarana permainan anak.

Sauntara kuwi, Kepala Desa Jurang Senggani, Mutmainah, nalika dijaluki katrangan Panjebar Semangat ngandhakake yen sasuwene libur sekolah, wisatawan kang teka menyang papan kene cukup akeh. Saben dina paling ora ana pemasukan Rp 300 – 400.000-nan . Yen dian minggu utawa libur nasional bisa nggayuh Rp 1 Yuta sedinane. Kanthi rega tiket mlebu kang cukup murah, Rp 5 ewu saben kendaraan, pancen ndadekake wana wisata Jurang Senggani iki dadi idola wisata anyar.

“Pengunjung bisa foto-fotoan kanthi latar belakang alas, apadene ing ngisore atusan payung lan bal warna-warni kang ana. Pendheke akeh spot foto kang unik lan khas kang mung bisa ditemokake ing lokasi iki” ujare Lurah Mutmainah.

“Malah yen dina minggu nang kene akeh sing dodol susu sapi segar, merga kene iki daerah peternakan sapi puhan” imbuhe Bu Kades.

 

Grojogan

Kaendahane Jurang Senggani pranyata ora mung bisa nekakake wisatawan lokal wae, nanging uga kerep ngundang minate  komunitas fotografer saka maneka daerah ing Indonesia. Iki kabukten, durung suwe iki ana 200 nom-noman kang hobine fotografi asal Yogyakarta, Jakarta, Bandung, Sulawesi lan Kalimantan padha nindakake even photo champ ing kene. Even mau kanthi nampilake model daerah kang menganggo pakaian batik khas Tulungagung, Gayatri.

Mesthi wae even kaya ngene iki migunani banget merga kanthi ora langsung melu mromosekake lan ngenalake budaya apadene papan wisata kang ana ing Tulungagung, utamane wana wisata Jurang Senggani.

Yen pengin dolan menyang papan iki, pranyata uga ora angel. Wisatawan bisa migunakake kendaraan pribadhi rodha papat apadene rodha loro. Yen saka pusat kutha Tulungagung arahe mengidul kanthi jarak 30 km, utawa kurang luwih 45 menit laku kendaraan pribadi.

Dene yen nganggo kendaraan umum, bisa migunakake ojek saka terminal bis utawa alun-alun kutha Tulungagung.

“Ongkose ora nganti Rp 20 ewu nganti tekan kene. Dene yen balike maneh mengko uga bisa migunakake ojek kang dikelola dening kanca-kanca pokdarwis kene” jlentrehe pak Sukaji.

Kawasan wisata Jurang Senggani pancen wis dikelola dening Pokdarwis Sidorejo kanthi nggandheng Perum Perhutani BKPH Tulungagung, sebab kawasan iki mujudake kawasan alas duweke Perhutani. 

Ing lahan kang jembare 6.2 ha iki, saliyane sumadya maneka wahana wisata, satemene uga ana air terjune. Air terjun utawa grojogan ksb dununge ing tengah alas gunung Wilis, mula kondisine alami banget, banyune bening lan resik merga asale langsung saka sumber pagunungan.

Ana cacah loro air terjun ing kene yakuwi grojogan Jurang Senggani lan grojogan Tiga Bidadari. Dhuwure grojogane antarane 150 m – 200 m. Mung emane akses tumuju mrono isih rada angel diduduk saengga dadi masalah dhewe kanggone pengelola.

Kanggo nuju menyang grojogan Senggani iki pengunjung bisa mlaku utawa migunakake motor trail. Yen mlaku sikil butuh wektu 1,5 jam suwene, jlentrehe Pak Sukaji. 

Ditambahake dening Pak Sukaji, kanggo nuju menyang grojogan Jurang Senggani iki pengunjung bisa njaluk dipandhu anggota Pokdarwis kang jaga ing kana. Jalaran iki pancen klebu wisata minat khusus kanggo para petualang, kanthi perjalanane cukup adoh lan ngeselake.

Nanging rasa kesel mau bakal kabayar yen wis weruh endahe grojogan Jurang Senggani lan grojogan Tiga Bidadari ing gunung Wilis, kandhane Pak Sukaji nutup obrolan karo Panjebar Semangat.

Nuwun. (THW)

Berita Terkait

Samak Minggu Ini

img

img

Sumber Semangat

Wong kang mbisu iku “luwih becik” katimbang wong kang guneman ala.

Klik

DOLANAN JAMAN KAWURI

Isih kelingan dolanan kaya ngene iki? Mesthine ing antarane para maos kang wis ‘yuswa’ isih padha kelingan ya. Balapan ban bekas mujudake dolanan jaman kawuri. Seru, murah lan nyenengake. Yuk nostalgia kanthi dolanan nyenengake ing jaman biyen iki yuk… (d/ist)***

Pethilan

E-dagang rame, ritel konvensional rontok

Blanja mung kari klik

Pelajar perlu diajak lunga menyang museum

Aja menyang mal wae…

Sumpah Pemuda dipengeti

Indonesia siji, dudu sing liyane