Kuwe Bulan Rasa Maneka Mangsakan
Diposting oleh : Administrator
Kategori: Kagunan Dapur - Dibaca: 141 kali

Durung suwe iki, sekolah Little Sun Surabaya nganakake adicara sing mirunggan. Yaiku, para muride nggawe kuwe bulan sing akeh cacahe. Kuwe bulan yaiku panganan sing saemper pia nanging empuk banget, digawe saka adonan glepung (trigu), banyu, gula, endhog, uga mertega. Umume, rasa/isen-isene kacang ijo utawa kacang merah. Ora tanggung-tanggung, sekolah Little Sun nggawe 183 jinis rasane/isen-isene. Olehe nggawe uga bebarengan guru lan wong tuwane.

Kabeh ana siswa Little Sun cacah 47, gurune 38, dene wali muride 18. Dene kuwe bulan sing digawe, isen-isene uga rada nyleneh. Ana sing kanthi rasa soto, rawon, pecel, uga rendhang, lan liya-liyane. Sing baku, sakehing jinis mangsakan Nuswantara ana.

Kuwe bulan utawa moon cake kanthi 183 rasa iku mesisan nggayuh rekor ing Musem Rekor Indonesia (MURI), sing maune durung ana. “Idhe wiwitane prasaja. Pihak sekolah lan para murid kepengin nganakake acara kanggo mahargya festival kuwe bulan,” kandhane Yovita Santoso, Wakil Kepala Sekolah Little Sun.

Yovita njlentrehake, wiwitane, isen-isene kuwe bulan sing arep digawe padha kaya umume. Saperangan mung diimbuhi bahan liyane. Kaya ta keju, coklat, gedhang, kacang, lsp. “Banjur idhe kasebut ngrembaka, isen-isene kita imbuhi ana sing saka daging, uga maneka mangsakan liyane,” ujare.

Wiwitane, kuwe bulan sing digawe mung nganti 114 rasa. Nanging alon-alon imbuh terus nganti dadi 183. Pancen prosese nggawe ora sedhiluk. Amarga, dibutuhake uji coba nggawe adonan, amrih dadi sing pas karo adonan kulite, nanging uga enak rasane. Sasuwene iki, nggawe maneka mangsakan lan nyamikan saka sakehing negara, pancen dadi salah sijine kegiyatan ing sekolahan Little Sun. Kejaba nuwuhake kreativitas siswa, uga minangka sarana nepungake maneka penggaweyan ing sajroning bebrayan.

Para murid katon sigrak lan greget marang adicara iki. Wiwit esuk, katon wis padha ora sabar miwiti. Sakabehing adonan sing wis diuleni lan diwungkus plastic iku banjur dioven. Sawise iku ditokake lan dileleti kuning endhog sing wis dikopyok. Banjur dioven maneh, lan sabanjure dileleti lenga salad.

Ing acara iku uga digelar drama kanthi tema ngenani asal-usule kuwe bulan. Critane kawiwitan nalika ing Tiongkok kana, Chang E, sisihane Hou Yi, sing ngombe obat dawa umur, ora kanyana bisa mabur menyang mbulan. Cekaking dongeng, Chang E banjur karan Dewi Bulan. Manut kapracayan iku, saben wiwitan sasi Oktober, Dewi Bulan bakal ngatonake anggane.

(prili)

 

Berita Terkait

img

Samak Minggu Ini

img

img

Sumber Semangat

Ora ana sing ora bisa diikhlasake...

Klik

OJEK MAYIT

Ojek mujudake salah sijine jasa angkut migunakake sepedhahmotor. Ing jaman modern saiki, jasa iki malah bisa dipesen liwat HP, yakuwi kang diarani Ojek Online (Ojol). Ojol ora mung ngeterake wong, nanging uga panganan, barang lan blanjan. Nanging senajan wis modern, pranyata ojol ing Indonesia isih klebu biyasa-biyasa wae. Beda karo ojek ing Kongo, Afrika. Ojek ing kene ora mung bisa ngeterake blanjan utawa panganan wae, nanging uga ngeterake mayit! Carane nggawa kanthi cara dibonceng ing mburi lan ditaleni rapet karo tukang ojeke. Maklum, mayit kuwi ora bisa nggamblok dhewe... (d/ist)***

Pethilan

Akibat anane lindhu, pegawe hotel lan restoran dikon prei

Ujian kanggo kita kabeh minangka bangsa Indonesia

Idrus Marham durung karep dadi justice kolaborator

Mbokmenawa isih bingung milih je­neng-jeneng kang pantes di-‘nya­nyek’-ake

Asil ing Asian Games 2018 dadi tetenger gumregah

Kabeh kanggo Indonesia