Perlu Sregep Makarya najan Neraca Perdagangan Surplus
Diposting oleh : Administrator
Kategori: Pangudarasa - Dibaca: 15 kali

Ekonomi sawijining uwong bisa diarani sehat samangsa pengasilané luwih gedhé tinimbang pengeluarané. Aja nganti besar pasak dari pada tiang. Semono uga perekonomian nega­ra, anggaran belanjané aja nganti defisit, sing banjur ditutup nganggo utang utawa ngedol kaskaya sing ana kanggo nutup kekurangané. Ing lalu lintas keuangan, neraca pembayaran sabisa-bisa kudu surplus, supaya duwé potènsi kanggo mba­ngun, lan supaya ing perdagangan antar negara bisa sehat lan kuwat, neraca perdagangané kudu surplus, ora defisit.

Senajan negara kita isih akèh kekurangané, akhir-akhir iki wis ana trend positif awit meraca perdagangané tansah surplus. Ing wulan Agustus 2017, neraca perdagangan kita surplus cukup gedhé, nganti nggayuh 1,7 miliar dollar AS utawa padha karo Rp 2,8 T manut nilai tukar Rp 13.412 per dollar AS. Iki surplus wulanan paling gedhé wiwit 2012. Kanthi mengkono surplus taun 2017 nggayuh 9,11 milliar dollar AS. Kanggo perbandhingan, Januari – Agustus 2016 neraca perda­gangan kita surplus 5,13 miliar dollar AS. Undhakan surplus mau utamané dijalari wiwit mundhaké rega sawetara komoditas primer. Apamanèh permintaan komoditas primer saka China kaya batubara lan baja indhustri mundhaké akèh banget.

Mundhaké permintaan mau laras karo perbaikan ekonomi Chi­na sing dadi mitra dagang kita paling gedhé. Jroning taun 2017 prosentase ekspor non migas menyang China 12,84 % saka total ekspor non migas kita sing gedhéné 98,8 miliar dollar AS. Nomer loroné AS, 11,51 %, saterusé Jepang (9,4 %). Negara telu iku pangsa pasaré nggayuh 33,75 %, luwih cilik sithik tinim­bang gabungan 10 negara utama liyané sing nggayuh 36,45 %.

Ing struktur ekspor Indonesia Januari – Agustus 2017, non migas nyumbang 90,78 %, sing paling gedhé saka indhustri pengolahan, yaiku 75,02 %, saka tambang 13,54 %, pertanian 2,2 %. Dinané iki sektor non migas isih didominasi déning lemak lan minyak héwan utawa nabati sarta bahan bakar mineral. Kode sistem terharmonisasi kanggo lemak lan minyak hewan utawa nabati antara liya digunakaké kanggo prodhuk minyak kelapa sawit mentah (CPO) sing sasuwéné iki dadi andhalan ekspor komoditas Indonesia. Agustus 2017 eksporé nggayuh 15,23 miliar dollar AS utawa ± 15,42 % saka total non migas. Déné ekspor bahan bakar mineral yaiku batubara nggayuh 13,24 miliar dollar AS utawa ± 13,41 % saka ekspor non migas. Kanthi mengkono, senajan mlebu katagori indhustri pengolahan, sabeneré ekspor non migas isih disangga déning sektor komo­ditas CPO, yaiku bahan baku asil pengolahan kelapa sawit. Ka­mang­ka saka CPO bisa diasilaké mawarna jenis prodhuk. Sau­pama prodhuk turunan iku sing dadi basis ekspor non migas Indonesia, nilai tambah lan dhampak penggandha ekonomi-né bakal luwih gedhé.

Surplus gedhé ing wulan Agustus iki nguwataké posisi nera­ca pembayaran kita sing uga surplus 700 yuta dollar AS. Surplus neraca pembayaran iki dijalari transaksi modhal lan finan­sial sing luwih gedhé tinimbang defisit transaksi berjalan, sing njalari defisit transaksi jasa lan pendapatan primer. Iki sanya­tané wis luwih apik tinimbang taun-taun kepungkur.

Senajan wis surplus ing neraca perdagangan, hilirisasi indhustri berbasis komoditas tetep perlu kudu dikuwataké, awit ndeleng pengalaman kepungkur, rega komoditas iku fluktuatif banget, ora mung manut hukum permintaan lan penawaran, na­nging uga kena pengaruh geo politik. Genahé, kita durung kena girang-girang gumuyu merga saiki neraca perdagangan lan neraca pembayaran surplus. Batubara sing kita ekspor kudu­né diolah manèh kanggo tenaga listrik sing dibutuhaké ing prodhuksi barang-barang jadhi, ora mung diekspor ngono waé. CPO kuduné diolah dadi barang-barang turunan sing ngasilaké nilai tambah sing gedhé, ora mung diekspor thok lan diolah déning negara liya. Prodhuk pertanian isih sithik banget sing diekspor, mangka sabeneré potensi kita bisa unggul yèn diolah kanthi bener. Ora bisa disélaki, yèn isih butuh kerja keras supaya Indonesia dadi negara sing luwih makmur. (MW)

Berita Terkait

Samak Minggu Ini

img

img

Sumber Semangat

Wong kang akeh ngucapake kabecikan iku “luwih becik” katimbang wong kang seneng mbisu.

Klik

BALAPAN WEDHUS

Sawijining bocah cilik lagi melu tandhing ing sawijining lomba balapan nunggang wedhus utawa mutton busting. Acara kaya ngene iki cukup populer jroning pawai Fourth of July parade ing kutha Vale, Oregon, AS. (d/ist)***

Pethilan

Mendikbud ngajab, bayare guru honorer ndang diwenehke

Iki sing jenenge menteri zaman now!

Mendikbud ngajab, bayare guru honorer ndang diwenehke

Iki sing jenenge menteri zaman now!

Panglima TNI ditulak mlebu AS

Mengko gek merga, titttt…. (sensor!)