NKRI Wis Mlebu Krisis Energi
Diposting oleh : Administrator
Kategori: Pangudarasa - Dibaca: 27 kali

Nyimak kahanan lan perkembangan energi ing negara kita akhir-akhir iki, saka pasokan lan permintaan panganggoné, wis pas yèn Indonesia diarani wis mlebu ing krisis energi. Permintaan saya gedhé, pasokan tetep utawa malah saya cilik. Mliginé minyak lan gas bumi, kacèké permintaan lan pasokan saya akèh, kamangka energi terbarukan durung optimal pemanfaatané. Yèn terus ditogaké, bab iki bakal ngrusak ketahanan lan kedhaulatan energi kita. Ana sawetara dhaérah sing minangka lumbung energi, pasokan listriké sok bermasalah. Contoné ing Balikpapan sering ana pemadhaman listrik tanpa pemberitahuan saka PLN. Kamangka Kaltim iku provinsi penghasil batubara lan migas. Pendhudhuk Kaltim bisa ngrasa didholimi, jalaran yèn asil tambang iku mung digunakaké kanggo dhaérahé, listrik bakal turah-turah, pembangunan infrastruktur dalan, bandara lan pelabuhan laut maju, pendhidhikan lan kasarasan terjamin. Nanging rèhné Kaltim iku bagiyan saka NKRI, laras karu UUD pasal 33, kaskaya mau dikuwasani déning negara lan digunakaké kanggo sagedhé-gedhéné kemakmuran rakyat. Kaltim dhéwé mung kebagiyan sithik banget, nganti listrik waé byar-pet.

Kapasitas terpasang pembangkit listrik kita 60.100 MW, sing 55,6 % diasilaké saka PLTU nggunakaké batubara. Krisis pasokan listrik uga ana ing wilayah terpencil kaya ing kacamatan Mentarang Hulu, Malinan, Kalut, durung kumanan listrik. Uga ing kampung Ngeliawan, pulau Wuriaru, Maluku. Kanggo bocah sinau, kepeksa penerangané padha nganggo lampu minyak tanah, kamangka ing kana rega minyak tanah Rp 20.000 / liter.

Kita wis impor BBM wiwit taun 2004 kanggo nutup kebutuhan sing luwih gedhé tinimbang kemampuwan prodhuksi. Kahanan iki, manut Direktur Pusat Studi Energi UGM Yogyakarta, Deenarianto, wis disebut krisis, ora usah ngentèni antrian uwong tuku BBM. Cadhangan minyak bumi kita kari 3,6 milliar barrel. Saben taun disedhot 288 yuta barrel, bakal entèk jroning 12 taun. Gas bumi ana 98 TCF. Yèn prodhuksi 3 TCF / taun, bakal entèk jroning 33 taun. Déné batubara ana 32,4 milliar ton. Prodhuksiné 393 yuta ton / taun, bakal entèk jroning 82 taun. Nyata cadhangan energi kita wis tipis, ateges satemené kita wis krisis energi. Émané, energi terbarukan kita sing potensiné 440.000 MW, lagi dimanfaataké ± 8.200 MW. Energi terbarukan iki ora bakal entèk, sing kuduné énggal dimanfaataké sakapik-apiké.

Ketua Ikatan Ahli Teknik Perminyakan Indonesia (IATPI), Pri Agung Rakhmanto ngandharaké Indonesia nyukupi kekurangan pasokan energi liwat impor. Impor dadi solusi ing satengahé kita ora kuwawa narik investor kanggo berinvestasi ing sektor energi, mliginé energi fosil. Wektu iki  impor elpiji kita nggayuh 5 yuta ton/ taun, rong protelon saka kebutuhan nasional. Diprediksi, kita bakal imporgas wujud LNG (gas alam cair) ing taun 2019. dideleng saka pengelolaan energi, minangka negara sing nduwéni migas lan sumber energi liyané, kahanan iku wis dianggep kalebu minangka krisis jroning ngemonah energi.

Katoné, pemerintah isih durung perlu nganggep yèn negara kita ing kahanan krisis energi. Éwa semono, ana usaha pemerintah antara liya ing energi terbarukan. Taun iki pemerintah nargetaké paling kurang 70 kontrak perjanjian dol tinuku tenaga listrik bisa ditandha tangani. Nganti wulan September 2017 ana 60 kontrak dol tinuku tenaga listrik ditandha tangani kanthi total kapasitas 720 MW. Pemerintah uga nargetaké penambahan pasokan listrik energi terbarukan kanthi kapasitas 3.864 MW nganti akhir taun iki. Ing bauran energi nasional, taun 2025 target kontribusi listrik saka energi terbarukan gedhéné 23 prosen utawa padha karo 45.000 MW.

Senajan sabeneré isih kurang marem, kita nampa kanthi apik usaha pemerintah mau. Sing uga penting, kita luwih seneng batubara kita digunakaké mrodhuksi listrik senajan mung kita anggo dhéwé, tinimbang diekspor lan dhuwité ora digunakaké kanthi efisien (dikorupsi) sebab iku kaskaya kita sing kuduné digunakaké kanggo kemakmuran rakyat.                          

(MW)

Berita Terkait

Samak Minggu Ini

img

img

Sumber Semangat

Wong kang akeh ngucapake kabecikan iku “luwih becik” katimbang wong kang seneng mbisu.

Klik

BALAPAN WEDHUS

Sawijining bocah cilik lagi melu tandhing ing sawijining lomba balapan nunggang wedhus utawa mutton busting. Acara kaya ngene iki cukup populer jroning pawai Fourth of July parade ing kutha Vale, Oregon, AS. (d/ist)***

Pethilan

Mendikbud ngajab, bayare guru honorer ndang diwenehke

Iki sing jenenge menteri zaman now!

Mendikbud ngajab, bayare guru honorer ndang diwenehke

Iki sing jenenge menteri zaman now!

Panglima TNI ditulak mlebu AS

Mengko gek merga, titttt…. (sensor!)