Cabe, Bisa Kanggo Tamba Awak Kesel lan Lemah Sahwat
Diposting oleh : Administrator
Kategori: Kasarasan - Dibaca: 294 kali

Cabe (piper retrofracti fructus) mujudake tuwuhan asli Indonesia kang akeh ditandur ing pekarangan. Cara thukule wit kanthi nemplekake watange lan nggu­betake awake ing wit liyane liwat oyode sing terus tuwuh lan tumempel ing wit kasebut. Mula wit cabe umume ditandur ing cagak utawa dirambatake ing wit gedhe (kayata wit pelem, rambutan, dhuku, lsp).

Disebut cabe, jalaran nduweni watak pedhes lan wujude kaya lombok. Mula cabe uga diceluk lombokan, cabean uta­wa cabe alas. Pancen jeneng ‘cabe’ iku dijumput saka tembung ‘cabai’ (Indonesia) kang ateges ‘lombok’. Nanging cabe iku dudu lombok, sebab cabe klebu go­longane wit suruh, kemekes, kemukus (la­dha) utawa mrica lolot.

Woh cabe dawane 2-7 cm, wujude gilig lan kulite pating pringkil, cabe sing isih enom rupane ijo. Rasane nyegrak lan pedhes, nanging sawise tuwa rupane malih dadi kuning gadhing lan pungka­sane malih dadi abang rasane empuk lan legi. Cabe uga mawa gagang kaya lombok.

Cabe lumrah kanggo bumbu pawon, umume kanggo nambahi rasa pedhes lan sedhep. Masakan sing asring ngang­go bumbu cabe yaiku gule (gule we­dhus). Gule sing bumbune ditambahi cabe satemah bakal nuwuhake rasa anget ing awak, cabe uga kanggo bahan gawe jamu sabab cabe sugih saka sa­kehing kandhutan zat kang mupangat (kayata zat piperina, piperidinia, piplar­tine, dienamide, sesamin, damar, gom, pathi, minyak atsiri, lll)

Cabe uga duwe mupangat kanggo ngrendhem dumadine rasa lara ing awak sarta ngawekani awak sing kesel lan lungkrah, oyod cabe kang ngandhut zat piperine lan piplartine iku tetela nduweni daya antipiretik, analgesik lan antiinfla­masi kang ngawekani dumadine ganggu­wan pencernakan, angel nggarbini amar­ga kandhutan (rahim) anyep, ngre­siki rahim sawise nglairake, awak loyo, lara stroke, rematik lan nyeri pinggang. Dene godhong cabe uga mupangat kanggo ngawekani weteng mules, kem­bung, mutah-mutah, diare, rekasa yen bebuwang, lara sirah, lara untu lan irung umbelen.

 

Tetamba Nganggo Cabe

Uwoh cabe akehe 2,5 tekan 5 gram, nuli dipepe nganti garing terus didheplok lan digawe kaya kapsul (pil) utawa digodhog. Cara iki bisa kanggo tetamba lelara werna-werna, kayata tamba wa­tuk, lara mriyang, sira mumet lan irung umbelen, lara untu, lsp.

Tepung cabe bisa diisep liwat irung utawa diseselake ing untu sing krowok, uga bisa kanggo pareman yen nandang lara rematik utawa kanggo pareman wanita kang bubar nglairake. Oyod cabe 2,5 gram terus digodhog utawa digawe glepung, bisa kanggo abot tatu lan lara untu. Tepung saka godhong cabe uga bisa kanggo kekemu nalika nandhang radhang mulut (gomen, aba ngganda, lsp).

Dene kanggo ngawekani lara liver, mundhuta telung iji woh cabe senyari empu lempuyang, lan banyu sacukupe. Cara pengracike: uwoh cabe lan empu lempuyang didheplok nganti lembut, banjur dicampur banyu sagelas, terus diperes lan disaring. Nuli diunjuk cukup kanggo saunjukan (akehe 100 ml). Na­nging enggal mandheg, lamun wis bisa bebuwang kanthi lancar.

Cabe uga duwe mupangat kanggo njaga vitalitas, nambah stamina, lan nikelake kasburane awak. Uga ngawekani panandhang lemah sahwat, ejakulasi dini, nyegah resiko impotensi, lan tamba awak kesel. Carane: mundhuta 30 gram woh cabe sing wis wujud glepung, telung lembar woh kemlandhingan kang wis diglepung, endhog pitik loro (dijupuk ku­ninge bae) lan madu sasendhok. Pangra­cike: kuningan endhog diublak, terus di­cemplungi glepung cabe lan uwoh kem­landhingan, ditambahi madu sinambi diu­dhak nganti rata. Sabanjure kanggo un­jukan padinan. (ISM)

 

Berita Terkait

img

Samak Minggu Ini

img

img

Sumber Semangat

Saupamane wae kabagyan iku bisa dituku, mesthi wong-wong sugih bakal nuku kabagyan mau. Lan kita bakal kangelan oleh kabagyan ksb merga wis diborong wong kang sugih mau. Nanging tujune ka­bagyan kuwi anane mung ing njero  ati lan pikiran. Ka­bagyan iku mung bisa didu­weni dening wong kang pin­ter nindakake sukur.

Klik

ARIF WICAKSANA

Grengsenge mbabat alas kanggo kabutuhan pembangunan kanthi ngurbanake sakehing warna-warna ijo ing alam, pranyata isih ana uga kang gelem ngalah lan ngajeni banget marang ‘pabrik’ oksigen ksb. Iki salah siji contone, dimen nylametake wit siji-sijine, panggawene dalan nasional lila dienggokake. Dadi, ayo ndadekake wit-witan minangka karib kita, ing ngendi wae. (d/ist)***

Pethilan

Amandemen gumantung keputusan politik

Gumantung kepentingane uga

Koalisi padhadene ngenteni capres cawapres

Intip-intipan rupa lawas

Lobi-lobi politik saya kerep

Kasak kusuk, nyang-nyangan…