LSW 39 / 2017
Diposting oleh : Administrator
Kategori: Layang Saka Warga - Dibaca: 48 kali

Butuh Bantuwan

 

Aku duwe tangga nunggal desa/kelurahan, tapi wis seje kampung. uripe jan mesakake tenan katula-tula, sèkèng alias wong ora duwe. Asmane bapak X.

Dheweke manggon omah nunutan, sing kahanane nrenyuhake banget. Omahe wis rapuh, yen wayah udan talange bocor lambah lambah, mbanjiri ruwangan sak omah. Wis kena dipesthekake yen mangsa udan, saben bengi kulawargane pak X padha lek-lekan sawengi natas nguras banyu udan saka talang bocor. Kudune didandani, nanging sing kagungan omah cuweg merga sing nunut mau (bapak X) gratis alias ora bisa mbayar dhuwit kontrakan. Rèng lan usuke wis padha kropos saking suwene ora didandani. Dadi yen ana udan angin gendhènge padha mlorot marahi bocor. Wis pokoke mung kari nunggu ambruke wae.

Nanging semangate pak X mau jian gedhe banget, senajan wis yuswa sepuh, nanging yen diukur karo wong lumrah kayane ora ana kang bisa ngembari kegiyatane. Dheweke duwe kegiyatan sing mulya, kanggo masyarakat ing kampunge.

Yen sore bakda Maghrib pak X mau mulang Ngaji/maca Qur’an kanggo bocah-bocah umuran SD ing kampunge. Kajaba kuwi seminggu pisan saben dina Minggu esuk, isih duwe kegiyatan mulang olahraga beladhiri Pencaksilat kanggo bocah bocah cilik ing desane. Padhahal kabeh kegiyatan mau ora nampa bayar alias gratis.

Isih ana siji maneh gegayuhane pak X kang jumbuh klawan programe udyana PS. Yaiku kepengin mulang/ngajari sinau maca nulis basa Jawa lan adeg Perpustakaan kanggo sapa wae sing mbutuhake. Eman dene gegayuhane pak X kang becik mau, engga wanci iki durung bisa kawujudan.

Nalika aku sambang nyang omahe pak X, dheweke kandha paling ora butuh dhana Rp 20-an juta. Kanggo mugar omah sing dinunuti, adeg Perpustakaan lan tuku kacamata tulis Rp 800.000 gawe mulang ngaji Al-Qur’an. Sakjane dheweke pengin banget nyuwun bantuwane para Dermawan, mligine para pejabat sing kabeneran maos tulisan iki. Pramila kagem sing kersa ngulurke bantuwan bisa ngubengi alamat ngisor iki.

Bantuane para dhonatur mesthi bakal ngenthengake panandhange sarta njurung rencanane sing luhur iku.

Nuwun. (Eman Suwarto, Desa Tegalsari RT 011 RW 001, Kec. Kandeman, Kab. Batang 51261)

 

Berita Terkait

Samak Minggu Ini

img

img

Sumber Semangat

Wong kang nglarani awakmu, yen dudu luwih kuwat ya luwih ringkih saka awakmu. Tumrape sing luwih ringkih saka awakmu, apu-ranen. Lan kang-gone kang luwih kuwat, apuranen awakmu dhewe.

Klik

PATUNG RASEKSA MAO ZHEDONG

Patung emas raseksa tilas pemimpin Cina, Mao Zedong ing desa Tongxu, Henan, Cina. Patung kang dhuwure 36,6 meter mawa cet emas iki madeg ing sandhuwure pategalane warga, ing desa Tongxu, provinsi Henan, Cina. Ragad kang dientekake kanggo mbangun patung iki kurang luwih Rp 6,3 milyar. Mao Zedong mujudake presiden pisanan negara pandha kang kuwasa suwene 27 taun. (d/ist)***

Pethilan

Rega pangan ngadhepi pasa dijamin

Pengin murah, tuku nang koran ae!

Gaya ngadibusanane Pres. Jokowi mujudake strategi komunikasi

Ana sing nggaya ote-ote uga

Legislator kena OTT KPK maneh. Ketua DPR Bambang Soesatyo nga¬jab iku kang pungkasan

Pungkasan sing korupsi apa pung­kasan sing konangan?