Pilih nunggu putusan MK, KPK Wegah Teka ing Pansus Angket
Diposting oleh : Administrator
Kategori: Dredah Masalah - Dibaca: 30 kali

DPR ora mung ngundang KPK supaya teka ing rapat dengar pendapat (RDP) ka­ro komisi III. Para wakil rakyat iki uga nga­jap marang KPK supaya gelem nekani undangane Pansus Hak Angket KPK. Nanging, pangajap iku ditulak. Komisi sing ditetuwani dening Agus Rahardjo iku gelem nekani undangan kasebut yen wis ana putusan uji materi ngenani resmine hak angket DPR marang KPK saka Mah­kamah Konstitusi (MK).

Kekarepan anane bukak-bukakan an­tarane DPR lan KPK saya gedhe menawa lembaga antirasuah iku nekani undangan rapat Komisi III DPR. Patemonan iku ditin­dakake Senin engga Selasa (12/9). Sa­kehing masalah dirembug ing patemonan tinarbuka iki. Saliyane bab penanganan barang rampasan, anggota dewan uga nakokake lapuran masyarakat sing mlebu menyang pengaduan masyarakat (du­mas).

Komisi III DPR uga mitakonake audit asil kang ditindakake Badan Pemeriksa Ke­u­angan (BPK) marang KPK, operasi tangkap tangan (OTT), lan proses penya­dhapan. Ora mung iku wae, komisi sing mbawahi masalah hukum kasebut uga mitakonake apa kang dikandhakake de­ning Ketua KPK Agus Rahardjo sing di­anggep ngancam anggota pansus hak angket. Ancaman iku muncul gegayutan karo sikepe pansus sing dianggep obstruction of justice utawa ngalang-alangi penanganan perkara hukum.

Anggota Komisi III Masinton Pasaribu nggelanake ukara sing nate dikandhakake Agus. “Yen sing ngandhakake iku dudu pejabat negara, nanging wong lumrah, me­nawa wae bisa dimangerteni. Na­nging, iki sing ngandhakake rak pejabat negara,” tandhese Masinton kang uga anggota pansus hak angket KPK.

Kejaba kanthi lisan, dheweke ngang­gep, surate KPK sing dikirimake menyang pansus gegayutan karo undangane Mir­yan S. Haryani isine uga ancaman. Pansus dianggep ngalang-alangi penanganan perkara korupsi e-KTP.

Politikus PDIP iki ngandhakake, ora nate sawijining lembaga sing ngleksanak­ake tugas slaras karo sing dadi wenange diancam dening lembaga liyane. “Iki dadi pengetan. Aku sakanca uga nindakake tugas negara,” jlentrehe Masinton.

Nanggapi pitakonane Masinton, Agus Rahardjo mratelakake yen dheweke ora nate duwe niyat ngancam anggota DPR. Agus Rahardjo kandha mung nenimbang­ake lan nyinaoni. “Aku njaluk ngapura yen apa sing dakkandhakake iku dianggep ngancam. Njaluk ngapura yen ana sing rumangsa kaancam,” ujare Agus Ra­hardjo.

Pejabat asal saka Magetan (Jawa Timur) iku nambahake, pasal ngalang-alangi penanganan perkara ditujokake marang perorangan, dudu lembaga.

Sadurunge, KPK nate njiret pawongan loro merga dianggep nindakake obstruction of justice. Dheweke sakloron kasebut yaiku Muhtar Ependy ing perkarane Metua MK Akil Muchtar, lan Markus Nari ing per­kara korupsi e-KTP.

Agun Gunandjar Sudarsa, ketua hak angket KPK ngandhakake,  perkara sing diadhepi KPK nglengkara rampung direm­bug ing Komisi III DPR. Dheweke uga ngajak komisi antirasuah kanggo lungguh bebarengan ing rapat Pansus Hak Angket KPK. “Aku sakanca ngajap, Pak Agus da­lah komisioner liyane gelem ngram­pungake bebarengan,” kandhane politikus Partai Golkar iki.

Nanging, sing dadi pangajape Agun Gunandjar Sudarsa iku langsung ditulak. Wakil Ketua KPK Laode M.Syarif ngan­dhakake, resmine pansus angket isih di­gugat ing MK. Pehake isih nunggu proses hukum sing lagi lumaku. Sasuwenedurung ana putusan saka MK, dheweke lan ko­misioner liyane ora bakal nuruti unda­ngane pansus.

Yen MK ngandhakake menawa KPK dadi obyek, aku kabeh bakal teka lan ngeloni sidhang ing pansus,” tandhese Laode.

Wakil Ketua Komisi III Benny K.Harman duwe panemu seje. Manut dheweke, sa­durunge ana putusan MK, KPK kudu gelem teka menyang pansus. “Aja diwalik-walik. Sapa wae sing diundang KPK uga wajib teka, mangkono uga nalika diun­dang pansus,” tandhese. (Jp)

Berita Terkait

Samak Minggu Ini

img

img

Sumber Semangat

Wong kang akeh ngucapake kabecikan iku “luwih becik” katimbang wong kang seneng mbisu.

Klik

BALAPAN WEDHUS

Sawijining bocah cilik lagi melu tandhing ing sawijining lomba balapan nunggang wedhus utawa mutton busting. Acara kaya ngene iki cukup populer jroning pawai Fourth of July parade ing kutha Vale, Oregon, AS. (d/ist)***

Pethilan

Mendikbud ngajab, bayare guru honorer ndang diwenehke

Iki sing jenenge menteri zaman now!

Mendikbud ngajab, bayare guru honorer ndang diwenehke

Iki sing jenenge menteri zaman now!

Panglima TNI ditulak mlebu AS

Mengko gek merga, titttt…. (sensor!)