Jula - Juli :
Diposting oleh : Administrator
Kategori: Rena-rena - Dibaca: 26 kali

Ature Redaksi Kaya taun kepungkur, mangayubagya tanggapwarsane PS sing ka-84, rubrik JULA-JULI seratane swargi Imam Supardi Pemimpin Umum/Pemred PS taun 1960-an kita “uripake” maneh. Sing nulis Sdl. Gunarso TS pembantu kita ing Jakarta, sing dadi pandhemene suwargi wiwit dhek ana Sekolah Rakyat.

 

==============

 

MABES Polri nembe iki mbongkar sindikat Saracen, sing gaweyane mitenah wong liwat media sosial kanthi bayaran atusan juta. Otake ana wong 4, sing siji wong wadon. * Saracen pancen sarap, kabar dora gaweyane bisa njalari seling surup.

***

RIKALA Ngersa Dalem Sultan HB X nggegadhang putrine dadi raja, MK ngabulake uji materi sing diajokake Pemprov DIY, saengga Gubernur DIY bisa dijabat dening wanita. * Tradisi diothak-athik, kareben mathuk, senajan ana sing kethuthuk!

***

JONRU Ginting sing gaweyane ngritik lan ngina Presiden Jokowi lumantar media sosial, saiki dilaporake para sutresna internet kanthi pandakwa ujaran kebencian. * Jonru Ginting bakal ora bisa turu, montang-manting merga ngina pejabat penting.

***

BELA marang nasibe muslim Rohingya ing Myanmar, FPI arep demo ana Candi Borobudur, nanging polisi Polres Magelang ora ngidinake. * Eling lur, sing padha udur dudu antarane Islam-Buddha. Yen mung arep uwur ya sukur, ning aja melu  bidhuren.

***

ANGGOTA DPR Masinton Pasaribu nantang KPK supaya nangkep awake, jalaran ora trima DPR diancam KPK kadakwa ngalang-alangi penyidikan. * Apa Masinton Pasaribu ora nonton yen beribu-ribu rakyat sebel karo Pansus KPK?

***

ANDIKA Surahman pandarbe biro perjalanan umroh “First Travel” ngaku wis ora duwe dhuwit blas senajan anggone ngapusi jemaah umrah luwih saka Rp 550 milyar. * Surahman gawe amarah, amarga bisnis umrah kanthi rega murah nanging ora lumrah.

***

MANTAN Meneg BUMN Dahlan Iskan sing diukum 2 taun, dibebasake Pengadilan Tinggi Jatim, amarga kabukten ora korupsi asset PT Panca Wira Usaha. * Dahlan Iskan pancen riskan, karepe tetulung usaha sing ora untung, malah dipenthung.

***

ING Cijeruk Bogor, M. Akbar pemborong sing lagi bangkrut, mentala mateni bojone nganggo pistol amarga ngedak-edak njaluk ditukokake mobil mewah. * Usaha lagi bangkrut, bojo kakehan sing dituntut, pikiran dadi kalut, ya iki dalaning maut!

***

SENAJAN wis diancam serangan militer dening Presiden AS Donald Trump, pemimpin Korea Utara Kim Jong Un tetep mbacutake program-program nuklir-e. * Kim jan sentul kenyut! Senajan kaya kintel mungsuh kuntul, tetep etel awit rumangsa kenthol!

***

PERTOKOAN gedhe ing Jakarta bangsane WTC Mangga Dua, Tanah Abang lan Glodok Plaza akeh sing padha tutup amarga kesaing dening mbladere toko online. * Toko online pancen praktis, regane ekonomis, tekane barang gelis, ning taokene sing ngenthis.

***

GEDHONG tingkat 6 sing umure wis 117 taun, nembe iki gawe gegere Mumbai India, jalaran ambruk dadakan lan nuwuhake korban tiwas 33 jiwa. * Manggon ing gedhong lawas sing kluwus, penduduk Mumbai ora uwas, wekasane malah padha tiwas.

***

WALIKOTA Tegal Siti Masita, ditangkep KPK jalaran nampa sogok Rp 5 milyar luwih, ning pegawai Pemkot malah padha sukuran nggundhuli sirah. * Walikota Tegal tegel korupsi, wekasane rakyate padha ora sothah, bandane Siti Masita bakal disita.

***

ING desa Sidoleren Gebang Kab. Purworejo (Jateng), ana penganten wurung ijaban jalaran calon bojone Wilis Prasetyowati,  jebul wong wadon uga. * Pacare Wilis pancen kaya belis, ngakune Raden Harjuna jebul mung Sarpakenaka.

Berita Terkait

Samak Minggu Ini

img

img

Sumber Semangat

Wong kang akeh ngucapake kabecikan iku “luwih becik” katimbang wong kang seneng mbisu.

Klik

BALAPAN WEDHUS

Sawijining bocah cilik lagi melu tandhing ing sawijining lomba balapan nunggang wedhus utawa mutton busting. Acara kaya ngene iki cukup populer jroning pawai Fourth of July parade ing kutha Vale, Oregon, AS. (d/ist)***

Pethilan

Mendikbud ngajab, bayare guru honorer ndang diwenehke

Iki sing jenenge menteri zaman now!

Mendikbud ngajab, bayare guru honorer ndang diwenehke

Iki sing jenenge menteri zaman now!

Panglima TNI ditulak mlebu AS

Mengko gek merga, titttt…. (sensor!)